Masipa sê die DA het aan Didiza geskryf en antwoorde versoek oor waarom dié instelling so afgeskeep word, asook die toestand van sy vee wat nie ordentlik gevoer word nie.
Die DA het die kollege Vrydag besoek en kan beaam wat Saai onlangs bevind het: dat die eens trotse instelling in ’n haglike toestand is. Die kollege se verval het egter geruime tyd gelede begin. Landbou.com het reeds in 2010 daaroor berig.
Masipa sê dit is totaal onaanvaarbaar dat enige landboukollege toelaat dat sy geboue tot so ’n mate agteruitgaan en dat sy diere afgeskeep word. “Kolleges en landbouskole leer studente hoe om diere en die grond te versorg. Dit is ook waar studente geleer word om hoe infrastruktuur op plase, soos pakhuise, skure en geboue vir diere, te onderhou.
“Die toestand van dié kollege is ongelukkig ’n aanduiding dat sy opleiding nie vertrou kan word nie. Indien dit is waaraan studente blootgestel word, is dit geen wonder dat daar so baie werklose gegradueerdes van landboukolleges is nie.”
Die DA het Didiza versoek vir antwoorde oor die volgende:
- Die swak toestand van die kollege se vee;
- ’n Uiteensetting van die begroting vir die onderhoud van landboukolleges se bates en hul waarde; en
- Die standaard-onderhoudsprotokol waaraan alle landboukolleges moet voldoen om hul opleidingslisensies te behou.
Masipa sê die Kaapse Instituut vir Landbou-opleiding op Elsenburg se grond en infrastruktuur is in ’n goeie toestand en studente kry daar die geleentheid om te oefen hoe om hul teoretiese kennis op die plaas toe te pas.
“Al Suid-Afrika se landboustudente verdien dieselfde hoëgehalte onderrig. Die landbou is noodsaaklik vir voedselsekerheid en ekonomiese ontwikkeling. Die regering moet verseker dat die toekomstige generasies van boere goed toegerus is vir hul belangrike werk.”
