Diesel gaan moontlik 20c/liter duurder in Desember wees weens die tradisionele styging in vraag in die noordelike halfrond, wat dan winter beleef.
Mnr. Tony Twine, ‘n ekonoom van die Econometrix-groep, voorspel dat die prys van petrol met 15c/liter kan styg, terwyl paraffien 18c/liter kan styg.
Twine sê dié styging kan ook aan ‘n relatiewe styging in die internasionale olieprys toegeskryf word. Die olieprys het verlede week op ‘n vlak van $88 per vat beweeg, maar oor die naweek gelukkig na minder as $85 per vat gedaal.
Die sterkte van die rand
Volgens Twine begin die rand ook swakker vertoon teenoor die dollar, wat ‘n hoër styging tot gevolg kan hê. Hy sê hoewel die rand/dollar wisselkoers nie tans soveel op en af beweeg soos die olieprys nie, beweeg dit wel. Dít kan die buffer wat die rand ten opsigte van brandstofpryse bied, beïnvloed.
Twine beskryf die styging in die dieselprys as “pynlik tradisioneel. Weens die winterseisoenaliteit in die noorde is hierdie ‘n tipiese patroon vir dié tyd van die jaar.”
Hy het wel verwag dat só ‘n styging vroeër in die dieselprys sou voorkom. “Die vreemdste was die groter styging in die petrolprys in Oktober, aangesien stygings in die laaste maande van die jaar gewoonlik die grootste vir diesel, dan paraffien en dan petrol is,” sê Twine.
16 November 2010
