Terwyl die prys van petrol effens daal, sal die prys van diesel, paraffien en gas môre weer styg. Internasionale ruoliepryse het gedaal vanweë covid-19-beperkings in China, wat tot ’n afname in vraag gelei het, en Amerika se aankondiging dat strategiese ruolievoorrade vrygestel sal word om ’n demper op die styging van ruoliepryse te plaas. Ruoliepryse is egter steeds hoog as gevolg van die voortslepende oorlog tussen Rusland en Oekraïne.
Luidens ’n verklaring deur die departement van energie is daar steeds ’n tekort aan dieselvoorraad as gevolg van ’n afname in uitvoer uit Rusland, ’n groot uitvoerder van verwerkte brandstof, beperkte voorraad en ’n hoër vraag na verwerkte brandstof.
As gevolg van bogenoemde, geld die volgende prysveranderings van môre (4 Mei) af:
• 93 oktaan- en 95 oktaanpetrol: R0,12 per liter goedkoper.
• Diesel met ’n swaelinhoud van 0,005%: R0,92 per liter duurder.
• Diesel met ’n swaelinhoud van 0,05%: R0,98 per liter duurder.
• Paraffien: R0,79 per liter duurder.
Die departement se tydelike verlaging van die algemene brandstofheffing, ’n poging om die druk op verbruikers se sakke te verlig, duur voort tot Dinsdag 31 Mei. Tot dan sal die totale brandstofheffing R2,44 per liter vir petrol en R2,30 per liter vir diesel wees.
Luidens die verklaring geld die hersiende sonedifferensiale in die prysstruktuur van petrol, diesel en paraffien van môre af. Die primêre tarief vir die vervoer van petrol en diesel via die pyplynnetwerk sal luidens die verklaring toeneem.
