Diesel kan tot 40c per liter duurder wees in Desember, terwyl die petrolprys met 25c per liter kan daal, voorspel mnr. Tony Twine, senior ekonoom van die Econometrix-groep.
Die styging kan grootliks aan die wintermaande in die Noordelike Halfrond en die gevolglike toename in die vraag na brandstowwe toegeskryf word.
Twine sê die internasionale olieprys het, ten spyte van die onluste wat in Egipte en Arabiese lande voorkom, die afgelope 10 dae aansienlik gedaal. “Ons is tans by sowat $106 per vat, en dit is sowat 4,5% laer as waar die prys begin November was.”
Hy sê die verskil van 65c tussen die styging en daling in die petrol- en dieselprys is ’n aanduiding van hoe sake in Europa staan. “Dit moet beteken dat die Europese mark ’n erge afswaai ervaar, want dit is ’n reusagtige verskil in ekonomiese terme.”
37% styging
Intussen sê Graan SA met so ’n hoë styging volgende maand, sal die dieselprys 37% hoër wees as wat dit in Desember verlede jaar was. “Die groothandelprys sal op R10,42 per liter te staan kom, terwyl dit verlede Desember R7,61 was,” verduidelik mnr. Corné Louw, senior ekonoom van die organisasie.
Louw sê na verwagting gaan graan- en oliesaadboere vir die res van die planttyd gemiddeld nog sowat 50 liter diesel per hektaar gebruik (dit sluit plant, spuit, stroop en wegry se dieselverbruik in). Die voorspelde styging sal ’n boer se dieselkoste met R20 per hektaar opstoot.
“Oor die hele graanbedryf is die voorneme om ongeveer 3,8 miljoen hektaar te beplant, so die verwagte styging van 40c/liter kan graan- en oliesaadboere ’n ekstra R76 miljoen kos,” verduidelik Louw.
Twine sê dit is tans baie moelik om te voorspel in watter rigting brandstofpryse in Januarie aanstaande jaar gaan beweeg.
“Die grootste bedreiging tans is ’n moontlike aanval van Israelse magte op Iran. Sou dit morsig word, kan Iran sy olie-uitvoer staak, wat ’n groot invloed op die mark sal hê.”
Die Departement van Energie kondig Vrydag (2 Desember 2011) die brandstofpryse vir volgende maand aan.
22 November 2011
