“Dit kán tog nie minder kos om koring uit Amerika na Suid-Afrika te bring as om WesKaapse koring na Randfontein te ry nie. Die stelsel van liggingsdifferensiaal moet verwyder word,” het mnr. Alwyn Dippenaar, Swartlandse koringprodusent tydens ’n inligtingsvergadering op Moorreesburg gesê.
Die vergadering is aangebied deur Graan SA in samewerking met die JSE se afgeleide kommoditeitsafdeling, om aan graanprodusente die jongste produkte beskikbaar te verduidelik, waaronder Candokontrakte.
Min produsente was teenwoordig. Dit is deur mnr. Chris Sturgess, direkteur van die betrokke JSE-afdeling, gelei. Van die produsente het hul frustrasies met onder meer die liggingsdifferensiaal en die gehalte van ingevoerde koring wat plaaslikgeproduseerde hoëgehalte koring se pryse afdwing, uitgelig.
Die Wes-Kaap is uniek deurdat die provinsie ’n surplusproduksiegebied vir koring is waarvan sowat 66% self verbruik word, en die res na die noorde van die land gaan, maar tog is besluite van die JSE op graanprodusente landwyd van toepassing.
Sowat 700 000 ton koring word jaarliks in die Wes-Kaap geproduseer, en 100 000 ton buitelandse koring kom ook die provinsie binne. Van dié 800 000 ton word 580 000 ton plaaslik verbruik. Die res word op Randfontein verhandel.
Die liggingsdifferensiaal van R580/ton wat op Wes-Kaapse produsente van toepassing is, ongeag waar hulle in die provinsie koring produseer, het ’n direkte uitwerking op pryse wat plaaslike boere ontvang. Die liggingsdifferensiaal is ook van toepassing op koring wat in die Wes-Kaap self verbruik word.
Die gehalte van ingevoerde koring beïnvloed die pryse van plaaslike koring. Die swakker gehalte van ingevoerde koring uit die Oekraïne byvoorbeeld, beïnvloed die totale koringprys nadelig.
Mnr. Andries Theron, ondervoorsitter van Graan SA en voorsitter van die Wintergraanwerkgroep, sê volgens ’n onlangse besluit van Graan SA gaan die gehalte van plaaslik geproduseerde en ingevoerde koring doelbewus nader aan mekaar gebring word. Omdat die swakker ingevoerde produk die binnelandse koringprys bepaal, is dit sinneloos om koring van uitstaande gehalte te produseer, maar geen premieprys daarvoor te ontvang nie.
“Ons gaan swakker plaaslike koring op die mark sit, maar vir instansies wat aandring op hoë gehalte, sal dit geproduseer word teen ’n premieprys om dit die moeite werd te maak vir die boer.” Sturgess het onderneem om aandag aan boere se frustrasies te gee, deur weer na die formule vir die liggingsdifferensiaal te kyk, asook na ’n premie op gehaltekoring.
