Die voormalige besturende direkteur van Senwes, mnr. Johan Dique, is die nuwe hoof uitvoerende beampte van Capespan.
Luidens ‘n verklaring het dié maatskappy ná ‘n intensiewe soektog op nasionale en internasionale vlak besluit om Dique aan te stel.
Dique sal mnr. Neil Oosthuizen opvolg, wat ná 13 jaar by die maatskappy besluit het om af te tree. Dique sal op 10 Januarie 2011 met sy nuwe werk begin, terwyl Oosthuizen op ‘n nie-uitvoerende vlak betrokke sal wees.
'Goeie kandidaat'
Dr. Paul Clüver, voorsitter van Capespan, sê hulle glo Dique sal die maatskappy na die volgende vlak van sake neem.
Dique was nege jaar lank by Senwes. Hy is ‘n geoktrooieerde rekenmeester, en het verskeie senior poste by die Premier Groep, Tiger Brands, Epol, Sasol Two en Agricor beklee.
Dique het Senwes aan die einde van Mei die jaar verlaat, aangesien hy gemeen het dit is tyd dat iemand anders die leisels by hom moet oorneem. Hy het in 2001 by Senwes aangesluit, en dit in drie kontraktermyne na een van die mees winsgewende maatskappye in Suid-Afrika omskep.
30 November 2010
