Die volgende ontleding van grondverkope in Suid-Afrika is van transaksies vir grond wat groter is as 10 ha in Mpumalanga, die Noord-Kaap en Noordwes vanaf Maart verlede jaar tot Februarie vanjaar.
In Mpumalanga was daar ’n dalende neiging in twee van die ses distrikte. Altesame 446 transaksies het 118 547 ha teen R2,765 miljard behels. Daarvan was 84 (19%) ooreenkomste van kleur, wat 32 066 ha (27%) teen R676 miljoen behels het. Al hoe meer transaksies (30%) is vir grond groter as 300 ha. In die distrik Komatipoort het die prys vir rand/hektaar met R 4 671 in die afgelope 12 maande toegeneem.
In die Noord-Kaap is 278 transaksies in 21 distrikte gesluit. Dit het 533 641 ha teen R2,069 miljard behels. Daarvan was 28 transaksies van kleur (10%), wat 70 014 ha (13,1%) teen R370 miljoen (17,8% van die totale waarde) verteenwoordig. Grondpryse in die distrik Kenhardt is veral aan die klim, met 'n toename in rand/hektaar van R3 761.
Altesame 65% van die transaksies was vir grond groter as 300 ha. In nege (42,8%) van die distrikte is dalende prysneigings waargeneem. Altesame 601 transaksies het in 14 distrikte in Noordwes plaasgevind. Net ses van die distrikte se pryse het gedaal.
Altesame 188 424 ha is verhandel teen R4,829 miljard. Daarvan was 97 (16%) ooreenkomste van kleur, wat 12,2% van die totale waarde behels het. Altesame 27% van die transaksies was vir grond kleiner as 50 ha.
