Enige bespiegelinge oor grond wat deur boere aan plaaswerkers afgestaan moet word, is voortydig en kan net lei tot verwarring, sê die organisasie in ’n mediaverklaring.
“Die Minister van Landelike Ontwikkeling en Grondhervorming het duidelik gestel dat hy teen April 2015 voorstelle oor die aangeleentheid wil kry. Verskeie prosesse in dié verband is nog aan die gang, so laat ons daarby hou,” sê die TLU SA se voorsitter, mnr. Louis Meintjes.
Hy doen ook ’n beroep op instansies en individuele boere om nie voortydig met bepaalde beloftes of ondernemings in dié verband na vore te kom nie. “Die Minister het aangedui dat hy ’n gesamentlike voorlegging van die landbou-eenheidsforum, Asuf, sou wou ontvang. Asuf werk nog hieraan. Net soos die TLU SA ook reeds sy reeds voorstelle oor grondhervorming aan Asuf voorgelê het, sou ons graag wil sien dat alle instansies en individue ook hulle gedagtes oor die saak aan Asuf sou wou voorlê vir verdere bespreking.
“Om halsoorkop verbintenisse te maak dat boere 20% van hulle grond moet afstaan, is nie so maklik nie. Die een skoen pas nie vir almal nie. Groter boere kan so iets moontlik makliker implementeer terwyl kleiner boere glad nie daarby kan uitkom nie. Hier sal ’n model en oplossing gevind moet word wat almal sal pas. Om voortydig aankondigings en beloftes te maak, sal ook by die Minister valse verwagtinge skep. Die landbou het stabiliteit nodig, wat net bereik sal word deur gesamentlike, wel deurdagte en ekonomies volhoubare besluite en optrede. Laat daardie proses asseblief toe om sy kringloop te voltooi,” versoek Meintjes.
