Die rede waarom Pioneer Foods die drankmaatskappy KWV wil koop, is om toegang te kry tot die “goeie, ou handelsmerke” en ’n groter uitvoerbasis.
’n Omsigtigheidsaankondiging op 29 Oktober het ’n einde gebring aan gerugte dat die voedselreus voelers uitgesteek het na die KWV.
Die Mededingingskommissie se uitspraak het Pioneer Foods nie gepootjie nie. Hy het aangedui hy stel ondanks die verhoogde boete van R500 miljoen steeds belang in die KWV, wat reeds in 1918 as maatskappy geregistreer is.
Volgens bespiegelinge in die media sal dit Pioneer Foods tot R800 miljoen kos om die KWV te koop. KWV-aandeelhouers kan volgens die gerugte die ekwivalent van R12 van Pioneer Foods kry vir elke KWV-aandeel wat hulle hou.
Mnre. André Hanekom, besturende direkteur van Pioneer Foods, en Thys Loubser, uitvoerende hoof van die KWV, het egter aan Landbouweekblad gesê dit is nog te vroeg om oor bedrae te praat.
Ondersoek eers
“Ons is nog besig met die ondersoek. Die aanbod sal eers later gemaak word. Daar is nog nie op ’n finale prys besluit nie,” het Hanekom gesê.
Pioneer Foods het tans net een alkoholiese handelsmerk (Hooch). Hanekom sê hulle het nie noodwendig daarin belang gestel om hul afdeling vir alkoholiese drank uit te brei nie, maar het eerder die geleenthede raakgesien wat die KWV vir hulle inhou.
“Die KWV het ou, bekende handelsmerke en is groot ten opsigte van uitvoer. Dit sal aan ons ’n groter uitvoerbasis gee.” Hy sê indien die transaksie suksesvol is, sal die KWV in die Ceres-divisie van Pioneer Foods opgeneem word.
Loubser sê “dit is die moeite werd” om Pioneer Foods se aanbod te oorweeg, maar hy sal omsien na die belange van die besigheid en die belanghebbendes én veg vir die grootste koopsom moontlik.
Loubser sê daar is baie emosies in boeregeledere sedert die onderhandelinge bekend geword het. Sy boodskap aan boere was dat hierdie ’n geleentheid is vir ’n besigheid “wat besig is om mooi reg te kom” en dat dit minstens oorweeg moet word pleks van om dit bloot die rug te keer.
8 November 2010
