In die aanloop tot die nuwe planttyd begin die bulle al hoe meer stem dik maak op die Safex-mieliemark. Alle aanduidings is dat Suid-Afrika op ’n knap voorraadsituasie, indien nie ’n tekort nie, afstuur.
Sterk uitvoer, ook na nie-tradisionele markte, duur voort. Teen middel verlede week was meer as 1 miljoen ton van die verwagte nasionale oes van 10,6 miljoen ton nog nie gelewer nie. Intussen het die uitslag van die Oesskattingskomitee se opname oor hoeveel mielies boere beoog om te plant, talle markdeelnemers onkant gevang.
Meer aanplantings
Die beoogde 2,6 miljoen mieliehektare wat boere teen middel Oktober aangedui het, is amper 10% meer as die afgelope seisoen se aanplantings. Teen ’n opbrengs van 4,7 ton per ha – die afgelope drie jaar se gemiddeld – kan dit ’n oes van 12,2 miljoen ton oplewer.
Die 2,6 miljoen ha is egter minder as wat baie verwag het. Sommige mense meen dit is nie genoeg om in die dreigende binnelandse mielietekort te voorsien nie. Die mark het dienooreenkomstig gereageer.
Teen middel verlede week was die naaste maandkontrak vir wit mielies op Safex 9% hoër as ’n week vroeër en die naaste maandkontrak vir geel mielies was 7% duurder. Mnr. Dirk Opperman, markontleder van die kunsmismaatskappy Profert, meen aanplantings nader aan 2,9 miljoen ha (13 miljoen ton mielies) is nodig om Suid-Afrika se plaaslike voorraad weer tot ’n gemaklike vlak te laat herstel. Hy meen egter die vrye mark sal in die volgende paar weke daarvoor sorg.
Hoër pryse
Namate pryse in reaksie op vrese oor knap voorrade styg, sal dit boere aanmoedig om meer te plant as wat hulle aanvanklik beoog het. Uitvoer het teen middel verlede week net onder 1,6 miljoen ton gestaan.
Graan SA verwag dat uitvoer teen die einde van die bemarkingsjaar (oor ses maande) sowat 2,1 miljoen ton gaan beloop. Ander meen egter dit kan veel hoër wees. Mnr. Frans Dreyer, ’n verhandelaar van die onderneming Vrystaat Mielies, sê hul jongste uitvoer-verwagting is 2,7 miljoen ton teen 30 April volgende jaar.
Die plaaslike mielie-eindvoorraad kan dan net sowat 5% van plaaslike verbruik wees. Graan SA verwag ’n eindvoorraad nader aan 10% van binnelandse verbruik. Vrystaat Mielies verwag ook dat boere se plantvoorneme hoër kan wees en dalk nader aan 2,8 miljoen ha kan beslaan.
31 Oktober 2011
