Groot kommer heers oor veiligheid in die Mokopane (Potgietersrus)-distrik na drie aanvalle op plase daar voorgekom het.
Luidens ‘n verklaring het die voorvalle verlede Donderdag (21 Oktober) plaasgevind. Twee mans het glo twee swart plaaswooneenhede op plase in die omgewing aangeval en die gemeenskap beroof en hul besittings geplunder. Een persoon is tydens dié voorvalle beseer.
In ‘n derde voorval is mnr. Willie Pienaar, ‘n boer van die distrik, glo met ‘n panga aangeval. Hy het beserings op sy arms, hande en kop opgedoen. Verskeie items is tydens die voorval geroof.
Geen sterftes
Mnr. Ockert Scherman, voorsitter van die Potgietersrus Distrikslandbou-unie (PRDLU), sê hy is baie dankbaar dat niemand tydens die voorvalle dood is nie.
Mnr. Chris Human, voorsitter van die Hanglip Boerevereniging en ‘n veiligheidsvoorsitter van die distrik, sê hy is baie dankbaar vir die spoedige reaksie van die Polisie by Mokopane en Tinmyne. Een van die verdagtes betrokke by dié aanvalle is spoedig aangekeer, terwyl ‘n tweede op vrye voet is. Sy identiteit is egter aan die Polisie bekend.
Human vra dat alle landbouers in die omgewing hul veiligheid moet opskerp, waaksaam moet wees en verdagte persone onmiddellik moet aanmeld.
Werkspermitte ‘n krisis
Die PRDLU is wel bekommerd dat die sloerdery met werkspermitte en paspoorte vir Zimbabwiese burgers in die land ‘n grootskaalse veiligheidskrisis tot gevolg kan hê.
Die sperdatum vir die verkryging van dié dokumentasie is 31 Desember, en daarna is werkgewers genoodsaak om werknemers sonder die dokumente af te lê, wat baie mense sonder ‘n inkomste en heenkome gaan laat. Dít kan risiko’s rakende veiligheid raak.
Die landbou kan help
Volgens Scherman het sy organisasie die departement versoek om die reëling wat tans in plek is dringend te hersien en om ‘n werkbare plan ter tafel te lê.
“Die landbou kan ’n bydrae lewer om die voorspelde chaos en menslike ontwrigting te verlig. Soos met die permitstelsel kan landbouwerkgewers sinvolle insette lewer. Die huidige besluite is sonder konsultasie geneem,” sê hy.
25 Oktober 2010
