Lande wat net uit klip en grond bestaan, geen weiding om vee te voer nie en diere wat dood lê – dis die gesig wat boere in die Herold-distrik in die Suid-Kaap daagliks moet aanskou te midde van een van die knellendste droogtes in dekades.
Só skryf boere op die Facebook-groep Help Herold Boere In Nood.
“Ons kry baie swaar. Ek is gebore in hierdie wêreld en ek is amper 60 jaar oud, maar ek het hom nog nooit so droog gesien soos nou nie. Ons drinkwater en veewater is op, ons riviere staan en ons damme is leeg,” vertel mnr. Weeber Truter van Trutersdal Angoras en bestuurslid by die Herold-landbouvereniging.
Twee jaar laas ordentlik gereën
Dit het twee jaar laas ordentlik gereën in die omgewing. Truter het verlede jaar slegs 41 mm reën gehad en vanjaar nog net 14 mm. “Dis absoluut kritiek tussen die Langkloofpad en die Swartberge.”
Boonop het die gebied in Desember onder brande deurgeloop, wat ook heelwat veld verwoes het. Volgens Truter het boere al hul kuddes verklein en diere selfs onder markwaarde verkoop.
“Ons grootste uitdaging is om ons vee aan die lewe te hou en ons kernkuddes te behou. Dit neem ’n hele paar jaar om weer ’n ordentlike kudde te bou. Ons het verlede jaar ’n misoes gehad wat permanente weidings en kontantgewasse betref.”
Rol moue op
Dit kos hom R350 000 per maand om sy 4800 oorblywende Angorabokke te voer, vertel Truter. Die boere rol nou self moue op om hulp te kry. Hulle het al heelwat voer vanaf mnr. Ollie le Roux in die Vrystaat aangery, maar dis die vervoerkoste wat hulle “doodmaak”. SSK op Mosselbaai en Agri Wes-Kaap het al gehelp om die vervoerkoste te subsideer.
“Ons hou binnekort ’n dinee in Waboomskraal sodat ons die publiek en die sake-ondernemings kan bewus maak van wat aangaan in die landbou. Hierdie is regtig ’n abnormale droogte en ons vra hulle om ons hierdie een keer te help.”
