Die droogte en groot hoeveelhede ingevoerde hoender wat plaaslike pryse afgedruk het, het die Suid-Afrikaanse hoenderbedryf in sy taaiste tyd tot nog toe gedompel.
Só sê mnr. Chris Schutte, uitvoerende hoof van die genoteerde pluimveeprodusent Astral, wie se bedryfswins in die jaar tot 30 September met 50% geval het.
Die groep se inkomste vir die jaar het met 6,1% tot R12 miljard gestyg, maar Schutte het gesê groter verkope in hoender was grotendeels weens hoër voorraadvlakke aan die begin van die boekjaar. Astral het eintlik juis in die twaalf maande op sy hoenderproduksie teruggesny.
Produksiekoste van hoender opgedruk
Hoër voerkoste, weens die droogte, het produksiekoste van hoender opgedruk en dit kon nie in verkoopspryse verhaal word nie.
“Die gemiddelde verkoopsprys van hoender het die afgelope jaar met 0,6% gestyg – ver benede voedselinflasie – omdat verkoopspryse onder enorme druk was weens 'n wanbalans tussen vraag en aanbod,” sê Schutte in 'n verklaring.
Die winsgewendheid van die groep se hoenderafdeling het met 91,1% geval tot R59 miljoen en sy netto bedryfswinsmarge was 0,7%.
Invoer by hoogtepunt
Schutte het gesê in Maart vanjaar het invoer van hoender 'n hoogtepunt van 57 700 ton bereik, gelykstaande aan sowat 10,3 miljoen hoenders, oftewel 55% van Suid-Afrika se weeklikse produksie.
Die SA Pluimveevereniging (SAPV) het by die Kommissie vir Internasionale Handelsadministrasie (Itac) aansoek gedoen om beskermingsmaatreëls teen ingevoerde hoender uit die Europese Unie, maar Schutte sê enige tarief anders as die maksimum van 82% sal waarskynlik nie die hoeveelheid wat ingevoer word, beduidend beïnvloed nie.
Die volle invloed van Amerikaanse invoer kan nog nie gesien word nie, omdat die VSA slegs 33% van sy jaarlikse kwota sonder teenstortingstarief gebruik het.
Inkomste op
Die inkomste van Astral se voerafdeling het met 15,3% tot R7,2 miljard gestyg, regstreeks danksy hoër gemiddelde verkoopspryse vir voer. Verkope het wel met 2,3% gedaal. Die afdeling se bedryfswins het met 14,7% tot R485 miljoen gestyg en sy bedryfswinsmarge was 6,8%.
Dit het nie goed gegaan met Astral se bedrywighede in Zambië en Mosambiek nie. In laasgenoemde het die groot verswakking van die land se geldeenheid tot verliese gelei en in Zambië het kragonderbrekings groot dieselkoste vir kragopwekkers veroorsaak.
