Hoewel dele van die Vrystaat die afgelope ruk tot 150mm reën gekry het, waarsku Vrystaat Landbou dat die droogte nog nie gebreek is nie.
Die organisasie sê in ’n verklaring dat dele van die Vrystaat tussen 100mm en 150mm reën sedert nuwejaar gekry het.
Reën plek-plek
Dié reën is egter beperk tot sekere dele van die Vrystaat en dit is steeds bitter droog in die suide en weste van die provinsie, waar sommige dele reeds vir die vierde agtereenvolgende reënseisoen onder droogte gebuk gaan.
Die onlangse reën was ook op talle plekke die eerste noemenswaardige verligting vir die huidige seisoen.
Volgens Vrystaat Landbou is die droogte veral erg by Smithfield, Rouxville, Dewetsdorp, Zastron en Vanstadensrus.
Die organisasie het ’n versoek gerig aan diegene wat boere, wat steeds baie swaarkry, wil help. Vrystaat Landbou is sedert Oktober 2015 met droogtehulp besig en het veral hulp nodig met fondse vir die aankoop van voer of voerpille.
Diegene wat kan help met fondse, voer of vervoer kan Cynthia Troost by 051 444 609 kontak of epos stuur aan cynthia@vslandbou.co.za.
Droogtehulp is broodnodig
Intussen sê mnr. Johan Vermeulen, wat boer met skape en Bonsmaras naby Fauresmith, dat die onlangse reën in die omgewing baie help maar dat dit ’n probleem is om genoeg voer vir sy diere te gee.
“Ek het al derduisende aan voer spandeer,” sê Vermeulen. “Die planne raak nou op. Die droogte is nie net ’n korttermynprobleem nie, my koeie kalf ook later. Dit is ’n lang storie om alles reg te maak.”
Daar het sover in Januarie 102mm op Vermeulen se plaas geval. Volgens hom het hy vir drie jaar ondergemiddelde reën gekry.
Hoewel hy geen hulp van die regering kry nie, help sy medeboere hom.
“Ek het skenkings van Boere in Nood ontvang. Ek hoop ons gaan nog reën kry. Ek het vanoggend in die veld gaan ry en 70% van die soetgras is morsdood. Die bossies het ook gevrek,” sê Vermeulen.
