Droogtetoestande het gelei tot geweldige skade aan die jong koring-aanplantings in veral die Swartland, sê Graan SA.
Mnr. Andries Theron, voorsitter van die koringwerkgroep, sê ‘n groot deel van die jonger koring wat in die Swartland geplant is, het doodgeskroei.
September was ‘n droë maand in dié streek met geen noemenswaardige reën wat geval het nie. “Dit is tans een van die belangrikste tydperke vir aarvorming, maar basies geen vog is beskikbaar nie. En die dagtemperature het vinnig hoë vlakke bereik,” verduidelik Theron.
Deel van oes beskadig
Theron sê na skatting is sowat 25% van die jong koring-oes beskadig, “en selfs al reën dit nou sal dit nie ‘n verskil maak nie. Daar is dele in die Sandveld waar dit eintlik tragies is om die koring te sien.”
Opgewondenheid bestaan wel oor die Suid-Kaap se oeste wat tans van die lande verwyder word. Theron sê van die produsente in dié streek kry opbrengste van tot 5 t/ha, wat rekord of bo-normale oeste is.
Lees meer oor die koring-oes in Landbouweekblad van 21 Oktober 2011.
14 Oktober 2011
