Intussen is produsente egter bekommerd oor rooivleispryse wat onder druk bly. Speenkalfpryse was gemiddeld sowat R35/kg, slagpryse sowat R55/kg vir klas A2/A3 en R48/kg vir klas C2/C3, het dr. Johnny van der Merwe, besturende direkteur van die landboumarkontleders AMT, vandeesweek berig.
Mnr. Dewald Olivier, uitvoerende hoof van Red Meat Industry Services (RMIS), sê dat die afwaartse druk op produsentepryse grootliks weens ’n gebrek aan verbruikersaanvraag is. “Ons het in Desember byvoorbeeld 100 000 minder kalwers geslag, wat daarop dui dat daar nie ’n afset vir rooivleis is nie. Die verbruiker se finansiële posisie laat hom eenvoudig nie toe om soveel rooivleis as voorheen aan te koop nie, en dit het ’n uitkring-effek op die hele waardeketting, van abattoirs wat minder slag, tot voerkrale wat minder diere aankoop, en uiteindelik het dit ’n impak op die boer se sak.”
Daarom, sê Olivier, is dit so belangrik om ’n doeltreffende naspeurbaarheidsprogram op die been te kry ten einde uitvoer te stimuleer. “Wanneer ons dan ’n situasie kry waar ons binnelandse prys val, kan ons dit met rooivleisuitvoer balanseer.”
