Sowat 26 000 besoekers het vanjaar se Agri Megaweek vanaf 17 tot 20 September in Bredasdorp bygewoon. Vir die eerste keer in 22 jaar het die ekspo meer as 25 000 besoekers gelok en net minder as 500 uitstallers het deelgeneem.
“Vanjaar het die 20ste Wêreld Jerseykonferensie en nasionale kampioenskap, die eerste Wêreld Dorperkonferensie en kampioenskap en die SA Damara-kampioenskap en die Suid-Kaap Ayrshire-kampioenskap verseker tot die uitstekende belangstelling en ondersteuning bygedra.
“Ons moet egter nie die landbou en die verbruikerspubliek se belangstelling onderskat in die aktuele gesprekke van Graan SA oor wintergraansake en van Agri Megagroep oor grondhervorming; die Mega bederf dames-oggend en in Tiny, die dwergbulletjie van die Breederivier-vallei, die SA Boerboelkampioenskap, die Wêreld Jersey Kaastoekennings en fantastiese daaglikse programme en kompetisies van die meer as 400 uitstallers nie,” sê mnr. Orton King, uitvoerende direkteur vir die Agri Megagroep.
Hy het die belangrikheid van landbou en die landelike gemeenskap beklemtoon as die voedselmandjie van die wêreld deur volhoubare, winsgewende boerdery en waardetoevoeging tot landbouprodukte.
“Sonder die ondersteuning van die sakesektor as borge, uitstallers en adverteerders het Agri Megaweek, en die voordeel wat dit bring vir die sake-gemeenskap van die Kaap Agulhas-streek, geen bestaanstreg nie. Duisende besoekers aan die ekspo dra ook by tot die streek se volhoubare groei deur aan die ekspo se behoeftes te voldoen vir produkte en dienste, verblyf, etes, bank- en selfoondienste, asook basiese inkopies,” aldus King.
Hy het alle belanghebbendes en die plaaslike owerhede en diensverskaffers bedank vir hul bydrae tot die sukses van Agri Megaweek 2014. Agri Megaweek in 2015 sal van 16 tot 19 September plaasvind.
Belangstellendes kan www.agrimegaweek.co.za besoek vir meer inligting.
