Sowat 200 000 ha veld is al sedert die begin van die brandseisoen in Augustus vanjaar deur weghol-veldbrande oor die Vrystaat heen verwoes.
Mnr. Malcolm Procter, ’n adjunk-direkteur van die Vrystaatse departement van landbou, bosbou en visserye, sê die meeste brandskade was tot dusver in die Oos-Vrystaat by Bethlehem, Harrismith en Warden.
Volgens hom het sowat 180 000 ha veld die afgelope naweek in die gebiede gebrand. Procter waarsku boere om nie hul veld oorhaastig vir weidingsdoeleindes aan die brand te steek nie, omdat daar na verwagting nog koue fronte op pad is.
Hy sê die brandgevaar met koue fronte is groter weens die sterker wind. “Hou eerder die weer dop en wees versigtig met die brand van veld totdat sowat 25 mm reën in ’n gebied geval het,” sê hy.
“Grondeienaars volg blindelings die voorbeeld van mense wat veld vir weidingsdoeleindes afbrand sonder om die weer in ag te neem.” Procter sê meer as 345 000 ha veld is verlede jaar deur brande in die Vrystaat verwoes. Mnr. Thinus Steenkamp, voorsitter van die sambreel-vereniging vir brandverenigings in die Vrystaat, het ’n beroep gedoen op grondeienaars wat oor genoeg weiding of voer beskik om die veeboere in die geteisterde dele van die Oos-Vrystaat te help. Belangstellendes kan met Vrystaat Landbou in aanraking kom wat die proses sal koördineer of Steenkamp by 083 738 5218083 738 5218 skakel.
’n Vergadering vind Dinsdag, 2 September, in Bethlehemse plaas oor ’n moontlike aansoek om die gebied tot rampgebied verklaar te kry.
