Sowat 2 000 leerders vanuit die Overberg en omliggende dele word tydens die Agri Megaweek by die Skolemelkdag verwag.
Die Skolemelkdag, ‘n inisiatief wat deur die Melkprodusente-organisasie (MPO) begin is, gaan leerders by die Agri Megaweek opvoed oor die suiwelwaardeketting asook die belangrikheid van suiwel in hul dieët.
Dié konsep was bietjie verder deur die MPO in die Wes-Kaap geneem deur ‘n verskeidenheid skolemelkprogramme deur die jaar aan te bied. Daar word tans op laerskole in Suid-Afrika gefokus.
Tydens vanjaar se Agri Megaweek, wat vanaf 15 tot 17 September plaasvind, gaan ‘n skoleprogram aangebied word wat aktiwiteite en praatjies deur rolspelers in die bedryf insluit.
Leerders sal ook die geleentheid kry om ‘n koei te melk en met regte kalfies en ander plaasdiere kennis te maak met die doel om hulle belangstelling vanaf ‘n vroeë ouderdom te prikkel.
Die primêre doelwit en langtermyn visie is om leerders uiteindelik as Suid-Afrika se toekomstige landbouprodusente, landbou-ingenieurs, navorsers en ekonome op te lei. Die MPO meen dit is van groot belang om meer skole moontlik te betrek.
Die MPO in die Wes-Kaap het in 2009 groot sukses met soortgelyke programme behaal. Die skolemelkprogram was ook ‘n treffer by die Swellendam-skou en die SA-kaasfees.
7 September 2010
