Teen Maart 2011 sal daar landwyd Polisie-eenhede wees om misdaad in landelike gebiede en op plase te bestry, sê mnr. Nathi Mthethwa, die Minister van Polisie.
Luidens ‘n berig op Nuus24.com het Mthethwa Donderdag (9 September) dié aankondiging tydens die bekendstelling van die 2009/’10-misdaadstatistiek gemaak.
Leemte van kommando-stelsel
Mnr. Zweli Mnisi, Mthethwa se woordvoerder, sê dié eenhede moet die leemte vul wat die afskaffing van die kommando-stelsel gelaat het.
“Die landelike gebiede is groot, dikwels moeilik bereikbaar en daar is op plekke geen selfoonopvangs nie. Die beamptes moet opgelei wees om binne dié raamwerk te funksioneer en hulle moet by die gemeenskap inskakel,” het Mnisi gesê.
Geen spesifieke datum vir die instelling van dié eenhede kon gegee word nie. Mnisi het wel opgemerk dat dié eenhede voor die einde van die huidige geldjaar sal terugkeer.
Politieke wil en leierskap
Mnr. André Botha, voorsitter van Agri SA se veiligheidskomitee, sê die minister en genl. Bheki Cele, die nasionale Polisiehoof, “toon die politieke wil en leierskap” om die plan te laat werk.
Hy het opgemerk dat samewerking tussen die georganiseerde landbou en die Polisie verbeter het: “Die gesindhede het verander en die reaksietyd (nadat ’n misdaad aangemeld is) het ook verskerp.”
10 September 2010
