Luidens ’n verklaring deur Saai kla studente dat die instandhouding van die geboue en terrein so ver agter geraak het dat dit ’n onveilige omgewing skep. “Van die eens trotse, tradisieryke instelling wat topboere en landboutegniese adviseurs opgelei het, is daar geen spoor nie.
“Foto’s en verslae van diere wat verhonger weens swak en verkeerde voeding, haglike krale, weiding waar rommel gestort word en dieresorgpraktyke wat die Dierebeskermingsvereniging na sy asem sal laat snak, staaf die studente se klagtes.”
Mnr. Francois Rossouw, uitvoerende hoof van Saai, sê Saai is veral bekommerd oor die invloed van die verwaarloosde geriewe op die gehalte van tersiêre landbou-opleiding. “Dit sou al rampspoedig gewees het as die kampus leeg gestaan het, maar hier word nog studente opgelei. Ons wil weet hoe dit gebeur het en iemand moet aanspreeklik gehou word.”
Dr. Theo de Jager, uitvoerende voorsitter van Saai, sê Suider-Afrika verwag van sy tersiêre landbou-opleidingsinstellings om jong boere aan die spits van internasionale mededingendheid te hou. “Daar is mense wat glo dat die foto’s van vervalle infrastruktuur en brandmaer beeste aangedik is omdat dit so buitengewoon sterk kontrasteer met die uitnemende kollege wat duisende boere en landbousakelui as hulle alma mater onthou, maar ’n foto kan nie lieg nie.”
Volgens Saai is die vee op die kampus in ’n swak toestand weens ’n tekort aan voer. Daar is skure vol goeie produkte, aanvullings en gespesialiseerde mengsels, maar dit word nie vir die diere gegee nie of die verkeerde voer word vir die diere gegee.
Saai het reeds ’n prokureur opdrag gegee om die verantwoordelike en aanspreeklike amptenare by die kollege op te spoor en waar nodig die howe te nader om inligting te bekom, regstelling te verseker en aanspreeklikheid af te dwing.
Landbou.com het die Landboukollege Potchefstroom vroeër vandeesweek om kommentaar genader en wag steeds vir terugvoering.
Van 2010 tot 2012 het Landbou.com oor berig oor verval en probleme by die kollege. Klik hier om meer te lees.
