’n Bejaarde egpaar van Noordwes is dood in hul huis aangetref en twee verdagtes word gesoek, sê die polisie.
Luidens ’n berig op Nuus24.com is die 72-jarige mnr. Don du Plessis en sy 68-jarige vrou, Jackie, se liggame Woensdag (3 November 2011) deur ’n besoeker in hul huis gevind.
Kapt. Elsabé Augustides, woordvoerder vir die polisie op Rustenburg, sê die egpaar is in hul huis aangeval. Jackie is een keer in die kop geskiet. Hul liggame is in twee verskillende kamers gevind.
Paartjie
Augustides sê ’n Zimbabwese paartjie wat vir die egpaar gewerk het, word in verband met die moorde gesoek. “Die polisie verbind hulle met die misdaad omdat hulle ’n dag voor die lyke gevind is, verdwyn het.”
Die vrou was ’n huishulp, terwyl die man algemene werk op die plaas gedoen het.
Vier verdagtes
Intussen is vier mans Woensdag (2 November 2011) vir die moord op ’n boer van Limpopo op Rustenburg aangekeer. Luidens ’n berig op Nuus24.com sou die groep vandeesweek in die landdroshof op Thabazimbi verskyn het.
Hulle word verdink van die moord op die 50-jarige mnr. Douw Brummer wat op 11 Oktober 2011 in die agterkop geskiet is. Sy liggaam is sowat agt uur ná die voorval op die grasperk voor sy huis gevind.
Lt.kol. Ronel Otto, woordvoerder vir die polisie in Limpopo, sê twee van die verdagtes is van Mosambiek, terwyl die ander twee van Zimbabwe afkomstig is.
Bron: Nuus24
4 November 2011
