Miljoene rand se skade is verlede week aan infrastruktuur op plase noord van Cradock, wat aan die Visrivier grens, aangerig toe meer as 140 mm reën binne 2 1/2 ure uitgesak het. Die Jenkinsloot en Kwaairivier wat afgekom het, het die Visrivier se vloedlyn hier tot op dieselfde vlak as in 1974 laat styg.
Mnr. Nico Grobbelaar van die plaas Grootfontein, beraam sy skade op meer as R2 miljoen nadat drie damme en vier keerwalle gebreek het. Van sy grensdrade, volstruiskampe en landerye oor ’n breedte van 150 meter, het ook weggespoel.
Grobbelaar sê hoewel hy versekering vir die nuwe arbeidershuise en pomptoerusting wat beskadig is het, hy nie dekking vir die landerye en oeste het wat daarmee heen is nie. “Dit gaan my ’n hele jaar neem net om die drade reg te kry en van die damme en keerwalle te herbou. Dit is die ergste skade sedert ek in 1978 begin boer het.”
Van die bure het beeste, bokke en ’n spilpunt verloor. Talle paaie is nog onbegaanbaar en baie telefoonlyne buite werking. Intussen het tussen 20 mm en 50 mm die afgelope week oor die grootste deel van die Oos-Kaap en Karoo met die uitsondering van die kusgebied, waar die droogte ernstige afmetings aanneem, uitgesak.
Boere met wie Landbouweekblad gepraat het is verheug, maar sê meer reën is nodig om die bo- en ondergrondse watervoorrade aan te vul.
