Mnr. Kamal Vasram, voormalige direkteur van Estina, en sy medebeskuldigde, mnr. Salieh Indurjeeth, word van beweerde bedrog van R37,7 miljoen aangekla en het op 10 Mei weer in die hof verskyn. Die klagte hou verband met die Vrystaatse Vrede-suiwelprojek waarby Estina, die Gupta-verwante maatskappy, betrokke was.
Die aanklagte volg op ’n gesamentlike ondersoek deur die Suid-Afrikaanse Inkomstediens en die ondersoekdirektoraat wat onthul het dat Estina doeane-uitklaringsdokumente ingedien het ter ondersteuning van ’n terugbetalingseis vir belasting op toegevoegde waarde. Vasram en Indurjeeth is vroeër vanjaar in hegtenis geneem en op borgtog van R10 000 elk vrygelaat.
Volgens die nasionale vervolgingsgesag word Vasram en Indurjeeth beskuldig van bedrog en oortreding van afdeling 54(1)(A) van die Wet op Internasionale Handelsadministrasie (Wet 71 van 2002), asook die oortreding van regulasie 22 van die Wet op Valutabeheer (Wet 9 van 1933).
Daar is bevind dat die verklaarde waarde van meer as R37,7 miljoen vir ’n sogenoemde nuwe pasteurisasie-aanleg vermoedelik buitensporig hoog was. Die aanleg, wat van Indië ingevoer is, se faktuur aan Estina is gerig deur die maatskappy Gateway in die Verenigde Arabiese Emirate.
Daar is bewyse dat die Guptas Gateway gebruik het as ’n kanaal vir geldwassery en om geld aan Suid-Afrika te onttrek.
Die staat voer verder aan dat die aangeduide waarde opsetlik en wederregtelik deur Estina en Vasram gebruik is om geld aan Suid-Afrika te onttrek tot nadeel van die belastingbetalende publiek.
