Kamal Vasram, voormalige
direkteur van Estina, en sy medebeskuldigde, Salieh Indurjeeth, verskyn 9 Maart
in die streekhof in Pretoria in verband met beweerde bedrog van R37,7 miljoen.
Die klagte hou verband met die Vrystaatse Vrede-suiwelprojek waarby Estina, die
Gupta-verwante maatskappy, betrokke was.
Die saak is uitgestel vir die blootlê van die dossier, asook hul regsverteenwoordigers se finansiële instruksies en instruksies oor die meriete van die saak.
Luidens ’n verklaring deur die nasionale vervolgingsgesag word Vasram en Indurjeeth beskuldig van bedrog en oortreding van afdeling 54(1)(A) van die Wet op Internasionale Handelsadministrasie (Wet 71 van 2002), asook die oortreding van regulasie 22 van die Wet op Valutabeheer (Wet 9 van 1933).
Die aanklagte volg op ’n gesamentlike ondersoek deur die Suid-Afrikaanse Inkomstediens en die ondersoekdirektoraat wat onthul het dat Estina doeane-uitklaringsdokumente ingedien het ter ondersteuning van ’n terugbetalingseis vir belasting op toegevoegde waarde.
Daar is gevind dat die verklaarde waarde van meer as R37,7 miljoen vir ’n sogenaamde nuwe pasteurisasie-aanleg vermoedelik buitensporig hoog was. Die aanleg, wat van Indië ingevoer is, is gefaktureer aan Estina deur die maatskappy Gateway in die Verenigde Arabiese Emirate.
Daar is bewyse dat die Guptas Gateway gebruik het as ’n kanaal om geld te was en geld aan Suid-Afrika te onttrek.
Die staat voer verder aan dat die aangeduide waarde opsetlik en wederregtelik deur Estina en Vasram gebruik is om geld aan Suid-Afrika te onttrek tot nadeel van die belastingbetalende publiek.
Die beskuldigdes is 31 Januarie in hegtenis geneem en op 1 Februarie op borgtog van R10 000 elk vrygelaat.
