Mnr. Andisa Potwana, direkteur verbruikersreg en –beleid, by die Departement van Handel en Nywerheid (DTI) het by ’n sake-ontbyt van AfricaBio in Pretoria oor GM-etiketering gesê ná ’n lang tyd van konsultasie word die regulasies nou gefinaliseer.
Regulasies oor die etikettering van GM-produkte moes al op 1 April 2011saam met die verbruikersbeskermingswetgewing in werking getree het. ’n Verwysing na GM-organismes het die regulasie onwerkbaar gemaak omdat daar geen “organismes” in die produkte teenwoordig is nie. Dit bevat bloot bestanddele of komponente van plantmateriaal wat deur ’n proses van genetiese modifikasie verbou is.
“Die konsultasieproses is opnuut hervat en daar was ’n groot verskeidenheid sieninge en kwessies wat oorweeg moes word,” sê Potwana. Ván die kwessies waaroor steeds kop gekrap word, is ’n drempelwaarde vir die toevallige teenwoordigheid van ’n GM-bestanddeel, óf dit moet geld vir voedsel vir menslike sowel as dierlike gebruik, die koste verbonde aan etiketering en toetse, die moontlikheid dat mense onnodig afgeskrik sal word en of dit as internasionale handelsversperrings gesien sal word.
“Vir ons is die belangrikste uitgangspunt dat die verbruikers die reg het om ingelig te wees en ingeligde besluite te kan neem. Hulle moet kan kies. Dit gaan glad nie oor die goedkeuring of afkeuring van die produkte nie,” sê hy.
Die GM-produkte wat in hierdie stadium kommersieel verbou word, is mielies, sojabone en katoen. Me. Justina Torry, Amerikaanse senior landbou-attaché in Suid-Afrika, sê die uitganspunt in Amerika is dat voedsel wat deur biotegnologie geproduseer is nie verskil van enige ander kos of enigsins ’n groter gesondheidsrisiko inhou nie. Dieselfde benadering ten opsigte van etiketering bestaan dus. Dit is vrywillig, moet waar wees en mag nie misleidend wees nie.
Etiketering word net by produkte verplig as daar ’n gesondheid- of veiligheidsoorweging is soos allergene, wanneer die sameseteling en voedingsinhoud aansienlik verskil óf as spesiale vereistes vir berging en voorbereiding nodig is.
