’n Bejaarde boer van Lydenburg wat in Botswana verdwyn het, se familie wag desperaat op enige taal of tyding van waar hy hom bevind.
Mnr. John Bullen (80) het spoorloos verdwyn nadat hy en sy vrou, Lorraine (78), in ’n droë rivierbed in die Chobe-natuurreservaat vasgeval het, berig Beeld.
Bullen het met vyf liter water, ’n sakkie eetgoed, ’n byl en GPS om hulp gaan soek nadat die egpaar vergeefs probeer het om hul Land Rover Discovery los te kry.
Staptog
Bullen het besluit om 37 km na die Savuti-kamp te stap en is nooit weer gesien nie. Hiënas, leeus en ander wilde diere in die omgewing het die staptog ’n baie gevaarlike idee gemaak.
Mev. Bullen het vier dae lank in die motor gesit en wag voordat sy deur ’n Nederlandse toergroep gevind is. Intussen soek soekgeselskappe steeds na mnr. Bullen.
“As hulle net iets kry. Enigiets. ’n Skoen, sy hoed, sy knipmes. Roofdiere kon dít tog nie ook gevreet het nie? Die onsekerheid maak ons gek. As ’n mens iets kry, kan ons die hoofstuk afsluit,” sê me. Estelle Bullen, die egpaar se skoondogter.
Bron: Beeld
18 Oktober 2011
