As deel van sy deurlopende verbintenis tot die ontwikkeling van opkomende boere het FarmSol Holdings met die samewerking met SAB vanoggend splinternuwe trekkers en boerderytoerusting aan 32 produsente in Taung, Noordwes, geskenk.
Begunstigdes het die skenking van R8 miljoen ontvang op ’n seremonie by die Ipelegeng-koöperasie in die Taung-munisipaliteit.
Mnr. Sipho Sibinda, een van die begunstigdes, sê die skenking het sy lewe verander het. “Ek is nou in staat om ’n goeie wins te maak. Ek het ’n huis gekoop en ek kan my kinders na ’n goeie skool neem. Ek is baie bly hieroor.”
Die oorhandiging is ’n gesamentlike poging deur FarmSol en SAB om verdienstelike boere te bemagtig en om hul produktiwiteit te verbeter. Dit sluit aan by FarmSol se jare lange pogings om te verseker dat toegang tot meganisasie en die nuutste tegnologie nie hindernisse word wat nuwe-eraboere terughou nie.
FarmSol beoog om van kleinboere volhoubare, kommersiële produsente te maak. Sedert die maatskappy se ontstaan in 2016 is duisende kleinboere en nuwe-eraboere ondersteun deur innoverende finansiering, marktoegang, uitbreidingsdienste en meganisasie-oplossings.
Mnr. Aron Kole, besturende direkteur van FarmSol Holdings, het gesê die skenking bemagtig boere om self hul suksesse te bepaal en ’n toekoms te skep wat hulle self wil sien. Volgens Kole is dié oorhandiging die eerste van vele boere-ontwikkelingsinisiatiewe op FarmSol se 2023-kalender.
“Trekkers het die mag om ’n plaas tot lewe te bring en om voedselproduksie moontlik te maak wat miljoene voed. Hierdie werktuie is egter die duurste toerusting wat jy op die plaas kan kry en SAB en FarmSol het dit vir die boere moontlik gemaak om te sê hulle is ook eienaars.”
Me. Zoleka Lisa, SAB se visepresident van korporatiewe sake, het gesê as ’n besigheid is SAB afhanklik van landbougewasse van hoë gehalte van florerende gemeenskappe en gesonde ekostelsels. “Ons gee ook om vir die mense wat dit laat gebeur en het hard gewerk om bestaande en opkomende boeregemeenskappe te ondersteun om toegang tot landboukundige inligting en die beste bedryfspraktyke te kry. Dit sluit in die benutting van tegnologie se krag om opbrengste en produktiwiteit te verbeter.”
Bydrae tot voedselsekerheid
Noordwes lewer ’n belangrike bydrae tot voedselsekerheid in Suid-Afrika. Meer as 20% van Suid-Afrika se mielie-oes word in die provinsie verbou.
Kole het gesê toegang tot meganisasie en tegnologie sal fundamenteel wees vir Noordwes om sy volle landboupotensiaal te verwesenlik.
“Sonder krag op die plaas en die toepaslike aanvullende gereedskap, werktuie en masjinerie sukkel boere om uit bestaansproduksie te kom. Die kleinskaalse plaassektor se vraag na meganisasie moet verhoog word om die landboupotensiaal van boere in Taung te verhoog. Dit sal produktiwiteit verhoog en beleggings uit die private sektor aanmoedig.”
Die maatskappy sien daarna uit om sy bedryfsdoelwitte van die bemagtiging van plaaslike verskaffers en boere te bereik en om sy maatskaplik-ekonomiese impak te verbreed.
“Meer moet gedoen word om meer opkomende boere te ondersteun, veral onder die jeug wat gretig bly om te boer. Baie wat die sektor wil betree, kom egter voor groot hindernisse te staan.”Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
