Mnr. Jacques Jordaan, ’n jong boer, sê hy het die plan gekry om ’n WhatsApp-groep vir hom en sy medeboere in die omgewing te begin, wat hulle in geval van nood op die plaas kan inspan.
Jacques se groep heet Boerehulp en hy moes reeds ’n tweede groep, Boerehulp2,
begin omdat die limiet op so ’n groep se ledetal 50 is. Hulle nader nou vinnig ’n ledetal van 70 vir plaasbewoners in die omgewing van Schweizer-Reneke, Vryburg, Migdol en Amalia.
Dit is maklik en vinnig om so ’n groep te stig en dit kos byna niks.Wanneer ’n plaasaanval sou gebeur, kan ’n plaasbewoner in nood net vinnig ’n enkele noodboodskap, soos “help”, aan die res van die groeplede stuur. Al die lede van die groep sal dit op een slag kry en onmiddellik sien wie hulp benodig.
“Almal het nie tweerigtingradio’s nie omdat daar nie oral ’n sein is nie, maar almal het selfone,” sê Jacques. Die hoofdoel van Jacques se groep is om in die geval van plaasaanvalle te help, maar dit is ook nuttig vir onmiddellike, wydverspreide
kommunikasie oor veldbrande, gesteelde vee, verdagte voertuie en verdagte mense wat rondloop, sê hy. Bel hom by sel 073 6446 645, of e-pos: jacquesjordaan5@gmail.com vir hulp.
Intussen wens die TLU SA die boere van Leeudoringstad geluk met hul flinke optrede in die vastrek van die moordenaars van mnr. Johan van Rensburg, ’n boer van die omgewing. Mnr. Hernry Geldenhuys, die TLU SA se adjunk-president en voorsitter van die organisasie se veiligheidskomitee, sê: “hierdie voorval het bewys dat landelike gemeenskappe hoogs effektief kan wees as hulle georganiseerd is in hulle eie plaaswagstelsels, met hulle eie kommunikasie- en reaksievermoëns.”
