Sterk fokus gaan op plaaswerkers tydens vanjaar se Agri Megaweek in Bredasdorp wees.
Die skou wat vanaf 15 tot 17 September gehou word gaan verskeie werksaamhede aanbied wat spesifiek op plaaswerkers gerig is.
Tydens die Agri Cape Week 2010 wat in April vanjaar in die Paarl gehou is, het Agri Mega die nuwe konsep getoets van spesifieke programme vir plaaswerkers. Plaaswerkers kry dan die geleentheid om waardevol en praktiese kennis op te tel, na verwante uitstallings te kyk en hul kennis onder mekaar te deel.
Na die plaaswerkers verskeie lesings bygewoon het gaan ‘n spreker hulle toespreek met ‘n motiverende praatjie.
Plaaswerkers wat hulle vernuf as trekkerbestuurders wil toets kan uitkyk vir die Agri Mega-trekkerdrywer kompetisie wat deur die loop van die Agri Megaweek aangebied word. Deelnemers aan die kompetisie moet ‘n aantal take op ‘n hindernisbaan uitvoer en kompeteer teen tyd.
In 2009 het meer as 50 deelnemers aan die kompetisie deelgeneem. Hulle is goed deur toeskouers ondersteun.
Overbergse plaaswerkers wat aan die streek se Plaaswerker van die Jaar-kompetisie gaan deelneem, moet op 15 September aanteken wanneer die galageleentheid vir die streekskompetisie gehou sal word.
Mnr. Colin Jonkers, wenner van die Overbergstreek se 2009-kompetisie, sê sy deelname aan die kompetisie en die feit dat hy gewen het, het sy selfvertroue ‘n groot hupstoot gegee en word nou meer gerespekteer in die gemeenskap. “Ek het opnuut bewus geraak van die belangrike rol wat plaaswerkers in die landbou vervul en is dankbaar daar word erkenning aan plaaswerkers gegee.”
Vir verdere navrae kontak Agri Mega se kantoor in Bredasdorp by 028 424 2890 of besoek die webwerf www.agrimega.co.za.
1 September 2010
