Mnr. Enoch Godongwana, minister van finansies, lewer môre sy jaarlikse begrotingsrede.
Mnr Gernie Botha, hoof- uitvoerende beampte van Vrystaat Landbou, sê Suid-Afrikaners word al hoe meer belas terwyl die staatsdiens nie meer sy verantwoordelikhede met dienslewering nakom nie.
“Individue en gemeenskappe word byna daagliks gedwing om self hul paaie, water- en sanitasie- en ander dienste in stand te hou om te kan oorleef. Vrystaatse boere het in 2022 reeds talle lewensgevaarlike paaie self herstel en honderde slaggate gevul – uit hul eie sak.”
Volgens Botha maak dit daarom net sin dat die staat gemeenskappe, en veral die boere wat gewoonlik die vinnigste inspring, tegemoet kom met opsies om hierdie uitgawes van belasting te kan verhaal.
Vrystaat Landbou het vroegtydig begrotingsvoorstelle by die ministerie ingedien. Dit sluit die volgende in:
As boere self paaie herstel, en hulle die diesel en uitgawes daarvoor as boerdery-uitgawes aandui, moet dit van belasting afgetrek word. Indien nie, moet dit ’n belastingaftrekbare uitgawe wees. Dieselfde geld misdaadvoorkomings- en sekuriteitsuitgawes.
Toestemming om as boere hul eie hernubare kragstelsels oprig, die koste daarvan afgetrek kan word as boerdery-uitgawes.
As boere se BTW- en inkomstebelastingopgawes geoudit word, moet terugbetalings so gou moontlik geskied, aangesien dit talle boere onder ernstige kontantvloeidruk plaas as dit vir maande vertraag word.
Volgens Botha sal belastingaftrekkings vir selfdoen-diensleweringsaksies bydra om die verval op die platteland te stop en om te keer. Dit sal ook vir alle gemeenskappe ’n voordelige alternatief tot onder meer diensleweringsbetogings wees en druk op die verswakte staatsdiens verlig.
“Met vanjaar se begroting het Godongwana dus ’n geleentheid om die landelike gemeenskappe te bemagtig om self die verval van die platteland stop te sit.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
