Twee lede van die Vrystaats wetgewer, dr. Roy Jankielsohn, Vrystaatse DA-leier, en sy kollega, me. Leona Kleynhans, ook lid van die provinsiale wetgewer, is Dinsdag toegang geweier tot die omstrede Vrede-suiwelprojek van die Vrystaatse departement van landbou.
Dié melkboerdery is sedert verlede week opnuut in die nuus nadat die sentrum vir ondersoekende joernalistiek amaBhungane ná ’n forensiese ondersoek onthul het hoe miljoene rande van Vrystaatse belastingbetalergeld via die Vrede-projek gekanaliseer is om vir die uitspattige Gupta-troue in 2013 in Sun City te help betaal.
Jankielsohn sê nadat die Vrystaatse premier, mnr. Ace Magashule, Maandag aan joernaliste gesê het die Vrede-suiwelprojek is “lewendig” en “produktief” het hy en Kleynhans besluit om Dinsdagoggend ’n oorsig-besoek as lede van die wetgewer te bring. Jankielsohn is ook lid van die wetgewer se portefeuljekomitee vir ekonomiese ontwikkeling.
Aikona inkom
Amptenare by die hek het geweier om hulle binne te laat en voorgestel dat hulle die Vrystaatse Ontwikkelingskorporasie (VOK) vir toestemming vra, omdat die bestuur van die projek ’n ruk gelede na die VOK oorgedra is.
Die VOK het hul by navraag na die provinsiale departement van landbou en landelike ontwikkeling verwys, wat op sy beurt gesê het hulle het ’n toestemming-brief van die speaker van die wetgewer, me. Mamiki Qabathe, nodig.
“Dít is absolute nonsens, en niks anders nie as ’n poging om te verhoed dat ’n soeklig op die omstrede projek geskyn word. Wettig-verkose lede van provinsiale wetgewers en die Parlement het nie toestemming nodig om ’n oorsig-besoek te bring nie, want dis hul Grondwetlike reg,” sê Jankielsohn in ’n verklaring.
Neem komitee soontoe
“Ek het die laaste paar jaar verskeie versoeke aan die voorsitter van die portefeuljekomitee oor ekonomiese ontwikkeling, mnr. Thabo Meeko, gerig om die komitee vir oorsig na die Vrede-projek te neem. Hy het dit geïgnoreer.”
Jankielsohn beskuldig Meeko daarvan dat hy alles in sy vermoë doen om die provinsie se ANC-geleide regering en veral Magashule teen ’n openbare soeklig te beskerm.
“Hoekom word ons toegang vir oorsig tot die plaas verbied as die Vrede-projek inderdaad ’n lewendige en produktiewe een is, soos premier Magashule beweer?”
