Geld om eise vir restitusie te voltooi sal teen ‘n jaarlikse koers van 6,6% moet groei om ‘n begroting van R9,9 miljard oor die mediumtermyn-bestedingsraamwerk (MTBR) te bereik.
Mnr. Pravin Gordhan, Minister van Finansies, het in sy begrotingsrede uitgelig dat die Departement van Landelike Ontwikkeling en Grondhervorming die uitstaande 4000 restitusie-eise oor die komende MTBR gaan voltooi.
Die departement het al verskeie kere aan die Parlement se portefeuljekomitee vir landelike ontwikkeling en grondhervorming erken dat hy vroeër die grondkwessie verkeerd aangepak het en dat hy nou op ‘n pad is om dit te herstel.
Hoeveel staatsgrond?
Om op koers te kom moet die departement sy register finaliseer van hoeveel hektaar grond die Staat besit en hoeveel grondeise nog in die Staatskoerant gepubliseer moet word.
Die MTBR se totale begroting is byna R28 miljard. Volgens bestedingsneigings van die departement word verwag dat sy begroting tot R9,9 miljard in die 2014/’15 geldjaar sal verhoog word vanweë onder meer die 5 000 jeugdiges wat onder die landelike jeugkorpsprogram aangestel is en die herkapitalisering van 525 plase wat in die moeilikheid geraak het.
R20 miljard vir restitusie en grond
Die restitusie en die hervormingsprogram is die grootste bydraers tot die styging in die departement se begroting. Gesamentlik sal dit waarskynlik R20,7 miljard tussen die 2012/’13 en die 2014/’15 geldjaar (MTBR-tydperk) beloop.
Dit word verwag dat besteding op konsultante oor die MTBR met ‘n jaarlikse koers van 20,2% sal verlaag tot R336 miljoen. Gedurende die 2008/’09 geldjaar het dit van R116 miljoen na R660 miljoen in 2011/’12 gestyg teen ‘n jaarlikse groeikoers van 78,8%.
Die departement se begroting vir die komende geldjaar (2012/’13) is byna R9 miljard, waarvan restitusie R3 miljard, grondhervorming R3,3 miljard en landelike ontwikkeling R935 miljoen kry.
22 Februarie 2012
