Aankope van boerderye wat op beide vee en wild fokus is aan die toeneem in veral die Karoo, sê Pam Golding Eiendomme.
Luidens ‘n verklaring sê die maatskappy ‘n tendens, waarvolgens professionele persone van stedelike gebiede gemengde boerderye wat vee en wild insluit aankoop, kom meer gereeld voor.
“Daar is groot belangstelling in Karoo-plase met realistiese pryse, en ‘n algemene skuif na gemengde boerderye wat wild, vee en akkerbou kan insluit,” sê mnr. Wayne Rubridge, die maatskappy se verteenwoordiger in die Karoo. Hy meen dié soort boerderye hou groot potensiaal in aangesien daar ‘n vaste inkomste uit die vee is, terwyl wild op ‘n ander deel van die plaas vir ekstra inkomste bestuur kan word.
Landbou-agtergrond
Volgens Rubridge het die meeste van die kopers ‘n vorm van landbou-ondervinding, meestal in die noordelike provinsies, KwaZulu-Natal of die Kaap. “Bestaande boere in die Suid- en Wes-Kaap word gelok deur die lae insetkoste op ‘n Karooplaas, om óf beleggingsgeleenthede uit te brei óf te verhuis.”
Kopers fokus tans baie op die volhoubaarheid van sake op ‘n plaas, en veral skaap-plase in die Karoo is hoog aangeskryf. “Byvoorbeeld, as daar 60 veeplase in ‘n gegewe distrik is, is nie meer as 10% van dié in die algemeen beskikbaar aan kopers op enige gegewe tyd nie, en in gesogte distrikte is daar gereeld geen plase te koop nie.”
Skaap-plase wat nagenoeg 1 000 ooie kan dra is baie gewild onder kopers. “Kopers sal gereeld plase waar vee, implemente, toerusting of besproeiing ingesluit is, koop. ‘n Ander trekpleister is dat die eiendom ‘n bestaande inkomste het en dus deurlopendheid in die onderneming bied,” vertel Rubidge.
Lees ook:
Plase in die Oos-Kaap populêr (2008)
Almal wil 'n plasie in die bos hê (2009)
Karoo-plase lok aandag (2008)
10 November 2010
