Kommer dat Suid-Afrika nie in sy mieliebehoeftes sal kan voorsien nie, word vererger omdat Amerikaanse, Brasiliaanse en Argentynse mielies tans nie ingevoer mag word nie.
Dié lande verbou en verbruik mieliekultivars met die Bt-geen (ingeboude insekbeskerming) en dit mag nie na Suid-Afrika ingevoer word nie. Kultivars met die Bt-geen kan slegs internasionaal verhandel word as die in- en uitvoerland dit vir verbruik goedgekeur het.
Kultivars nie goedgekeur
Amerika, Brasilië en Argentinië het elk een of twee Bt-kultivars wat nog nie vir die Suid-Afrikaanse mark goedgekeur is nie. Omdat dié lande nie kultivars afsonderlik in verskillende silo’s opberg nie, mag niks van hul mielies ingevoer word nie.
Mnr. De Wet Boshoff, uitvoerende direkteur van die Vereniging vir Veevoervervaardigers (Afma), sê die hoeveelheid Suid- Afrikaanse mielies wat vir uitvoer bestem is, is met ongeveer ’n halfmiljoen ton onderskat. Suid-Afrika sal waarskynlik eersdaags ’n uitvoerder van wit mielies en invoerder van geel mielies wees.
“Omdat Suid-Afrika nie Bt-mielies kan invoer nie, moet ons noodgedwonge kyk na lande wat nie Bt-mielies verbou nie. Gevolglik sal ons amper ál ons mielies vanaf lande soos Roemenië, Hongarye, Serwië en die Oekraine moet invoer.”
Boshoff sê die situasie is reeds só netelig dat oorweeg word om die Regering amptelik daaroor te nader. “Indien dit wel ’n krisis word, sal die Regering dit moet oorweeg om ongeregistreerde Bt-mielies in te voer.
Beperkte hoeveelhede
"Dit sal slegs in ’n beperkte hoeveelheid onder streng beheer in ’n spesifieke gebied gedoen word. Die Wes-Kaap het byvoorbeeld amper jaarliks vanaf Desember tot Maart ’n tekort aan geel mielies.”
Mnr. Jannie de Villiers, hoofbestuurder van Graan SA, sê die plaaslike mark moet eerder teen invoer beskerm word omdat invoer tot siektes kan lei. De Villiers sê egter Graan SA is nie ongenadig nie.
“As ons te min kos het, moet ons mielies invoer. Dit moet net nie só gebeur dat ouens goedsmoeds kan invoer nie.”
30 November 2011
