Die regering van Georgië is op soek na drie Suid-Afrikaanse landboukenners om in ’n advieskomitee te dien wat landbougeleenthede vir Suid-Afrikaanse boere in Georgië kan ondersoek.
Dit volg nadat die Georgiese regering vir die TLU SA om landbouhulp genader het en ’n groep Suid-Afrikaanse boere die land besoek het. ’n Verslag oor die besoek is pas by die TLU SA se algemene raad aanvaar.
Die landboukundiges sal met verskillende departemente in Georgië saamwerk om ‘n ontleding te doen van die landboupotensiaal in verskillende streke. Hulle sal moet bepaal waarmee en óf Suid-Afrikaanse boere in daardie toestande sal kan boer.
Hulle word benodig vir ’n tydperk van ten minste drie maande met die moontlikheid om dit te verleng tot 'n jaar. Indien moontlik moet hulle reeds 1 Desember beskikbaar wees.
Aansoeke van persone wat sou belangstel om deel van die advieskomitee te wees moet hulle volledige CV's voor 12 November aan die TLU SA stuur.
Die algemene vereistes is:
Magistergraad in landbou of verwante gebied
Praktiese ondervinding in die landbou-omgewing vir ten minste drie jaar
Kennis van bees-, skaap-, hoender-, kalkoen- en varkboerdery sowel as voerkraalondervinding.
Koring en mielies primêre verbouing
Appel-, perske-, kersie- en sitrusverbouing
Bessies en tafeldruiwe.
Ondervinding van wetenskaplike ondersoeke in die landbou dien as aanbeveling
Kennis van Afrikaans en Engels
Moet gemotiveerd en entoesiasties wees oor die projek
Salarisse sal direk met moontlike kandidate onderhandel word, maar sal sowat $2 000 per maand wees. Woonstelle sal vir die kandidate beskikbaar gestel word (met ander woorde gesinslede kan saamgaan) en vervoer (voertuig, brandstof en drywer) word verskaf.
Selfone met onbeperkte minute word verskaf, sowel as kantore met al die nodige toerusting daarin. Die vlugkaartjies word vir die kandidate betaal, maar indien gesinslede hulle vergesel sal dít self betaal moet word. Mediese versekering word ook betaal vir dié persone.
Alle ander belangstellendes wat inligting oor geleenthede wat hieruit kan voortspruit wil bekom, kan ook hulle besonderhede aanstuur met die oog op ’n databasis. Dit geld ook vir beleggings wat wyer as net die landbou strek.
Alle inligting oor geleenthede sal aan belangstellendes beskikbaar gestel word.
Stuur dit vir aandag: Die Hoofbestuurder by e-pos: hb@tlu.co.za of faks 012 - 804 2014
Baie belangstelling van boere
Intussen berig News24.com dat 60 plaaslike boere belangstel om in Georgië te gaan boer. “Enige iemand kan daarheen gaan, nie net Suid-Afrikaners nie. Die Georgiese staat besit landbougrond in elk van die land se 10 provinsies en wil dit aan kommersiële bopere verkoop,” sê mnr. Bennie van Zyl, hoofbestuurder van die TLU SA.
Hy meen die eerste doelstelling is om in Suid-Afrika te bly en ‘n positiewe bydrae te maak, “maar wat moet ons doen as ons nie ‘n kans gegun word nie?”
Lees die geskiedenis:
Sarie Marais agter die ou ystergordyn
Georgië se arms oop vir SA boere
Georgië, TLU SA beplan navorsingsplaas
29 Oktober 2010
