Die 2017/’18 oesseisoen vir suikerriet het in April afgeskop en hoewel die vooruitsigte vir die suikerbedryf steeds bykans 20% onder normaal is, is produksie in ’n opwaartse kurwe.
Volgens mnr. Richard Nicholson, ekonomiese navorsingsbestuurder by Canegrowers, die suikerrietkwekersvereniging, verwag hulle ’n oes van slegs 16,5 miljoen ton in die 2017/’18 seisoen. Dis 17% laer as die bedryf se gemiddelde oes van 19,9 miljoen ton per jaar.
“Dis nietemin ’n toename van 10% in opbrengs teenoor verlede seisoen se 15,074 miljoen ton. Die droëlandboere het verlede seisoen ’n goeie herstel beleef weens relatiewe goeie reën oor meeste gebiede. Die besproeiingsboere het egter ’n 30% afname in opbrengs ervaar in die noorde van KZN en Mpumalanga weens die droogte.
Droogte gebreek
“Die droogte is egter nou gebreek in die produksiegebiede en vandaar die vooruitsig op ’n 10% toename in opbrengs. Die skade wat egter weens die droogte gelei is, veral vir die meer as 20 000 kleinboere word nie in een seisoen ongedaan gemaak nie.”
Die voorsiening van genoeg gehalte plantmateriaal is regdeur die bedryf ’n uitdaging in die huidige seisoen. “Die hektare onder suikerriet toon ’n afname oor die afgelope twee jaar, maar dit is meestal weens die droogte. Hierdie hektare sal weens die beter weersomstandighede hervestig word.
Plaagbestryding belangrik
“Plaagbestryding en siektebeheer bly ’n noodsaaklikheid vir die bedryf. Nuwe chemiese middele wat Eldana meer suksesvol bestry as voorheen is tot groot voordeel van produsente. Veral in die kusstreke, waar meer doeltreffende plaagbestryding beteken dat die groeiseisoen verleng kon word en dus die gehalte van die suikerriet verbeter.”
Die herwinbare waarde, waarvolgens produsente vir hul suikerriet vergoed word, het met 24% toegeneem jaar-op-jaar vir verlede seisoen. “Die gehalte van die suikerriet verlede seisoen, weens die lang droogte en toe die goeie reën, was egter nie baie goed nie en produsente kon nie ten volle munt slaan uit die hoër prys nie.”
Die vooruitsig vir die huidige seisoen, mits die weer sy normale patroon volg, is dat die interne gehalte van suikerriet beter sal wees. Die voorgestelde suikerbelasting is egter vir die bedryf ’n groot kommer. “Hier heers steeds geen sekerheid oor beleid nie en die kwessie is vir nog ’n jaar uitgestel. Die gebrek aan beleidsekerheid oor die gebruik van suikerriet as ’n hernubare energiebron en dus die potensiaal om die bedryf uit te brei en diversifiseer, is ’n verdere frustrasie,” sê Nicholson.
