’n Kennisgewing is uitgestuur oor die moontlike voorkoms van stukkies glas in verpakkingsmateriaal vir vrugte, sê Hortgro.
Luidens ’n verklaring het Huhtamaki SA (Edms.) Bpk. sy plaaslike kliënte in kennis gestel dat hul verpakkingsmateriaal vir vrugte moontlik stukkies glas in kan hê.
Die houers word gemaak van ’n pulp van herwinde papier. Dit word gebruik om vrugte in houers te verpak om na markte vervoer te word. Hortgro, die sambreelbedryfsliggaam vir die kern-en steenvrugbedrywe, sê volgens Huhtamaki is die waarskuwing van toepassing op produkte wat van 12 September 2011 tot 7 Maart 2012 gelewer is.
Hortgro het hierop gereageer deur die versekering te gee dat alle pakhuise oor dié verwikkeling ingelig is sodat moontlik besmette produkte onmiddellik verwyder kan word. Huhtamaki het ook bevestig dat hulle stappe gedoen het om te reël dat alle moontlik besmette voorraad apart van ander voorraad gehou word tot dit fisiek deur Huhtamaki verwyder word.
Ander materiale
Hortgro sê dit is belangrik om daarop te wys dat die grootste meerderheid van Suid-Afrika se vrugte in ander tipe materiale verpak word en nie deur dié voorval beïnvloed word nie. Die bedryf het ook verpakkingsmateriaal wat nié besmet is nie.
Rabe sê die plaaslike bedryf is wêreldbekend vir sy geoliede stelsel ten opsigte van protokol en produkgehalte, en dié probleem behoort sonder enige groot haakplekkke uitgesorteer te word.
’n Baie lae risiko word met die voorval geassosieer, maar alle veiligheidsvoorsorgmaatreëls sal toegepas word. Hortgro het Huhtamaki ook versoek om ’n onafhanklike kommissie van ondersoek aan te stel om enige moontlike risiko’s te bepaal.
Huhtamaki het aangedui dat ’n ondersoek na die voorval aan die gang is en dat die bedryf op die hoogte van sake gehou sal word.
15 Maart 2012
