Die gebruik en ontwikkeling van geneties gemodifiseerde (GM) gewasse gaan belangriker word vir oorlewing, meen ’n Kanadese kenner.
Dr. Jerome Konecsi, hoof van die Agricultural Biotech International Conference (ABIC)-stigting in Kanada, sê: “In Kanada word die doel om die wêreld te voed belangriker as die bestaande emosionele debatte wat nie op feite gebaseer is nie.”
Konecsi is een van die sprekers wat dié week aan die eerste ABIC-konferensie in Suid-Afrika en Afrika in Sandton deelneem. Hy sê wat biotegnologie betref, is dit belangrik om te weet dat landbou-biotegnologie net nie op die GM-bedryf fokus nie, hoewel dit ’n belangrike uitvloeisel van die bedryf is.
Droogtebestande gewasse
Prof. Jennifer Thompson, die voorsitter van die konferensie, sê tans geniet die ontwikkeling van gewasse wat droogtebestand is, wêreldwyd voorkeur. Dít is ’n gevolg van klimaatsverandering en die impak wat dit het op voedselsekerheid en boere se vermoë om finansieel te oorleef.
Thompson sê hulle is baie opgewonde oor toetse wat tans op ’n geen gedoen word wat Monsanto vir navorsing geskenk het. Sy sê dit word tans in verskeie Afrikalande, soos Suid-Afrika, Uganda en Kenia, getoets.
Miljoene hektaar
Volgens algemene inligting wat by die konferensie verskaf is, plant sowat 15 miljoen boere in 29 lande tans 148 miljoen hektaar se biotegnologie-gebaseerde gewasse aan. In Suid-Afrika word sowat 2,2 miljoen ha se biotegnologies gemodifiseerde mielies, sojabone en katoen aangeplant.
Suid-Afrika is onder die vyf top-lande in die wêreld wat biotegnologies gemodifiseerde gewasse aanplant. Die ander lande sluit China, Indië, Brasilië en Argentinië in.
7 September 2011
