Die landbousektor het ‘n gunstige groei van 16,3% in die derde kwartaal aangeteken, terwyl die algemene groeikoers in dieselfde tydperk gedaal het.
Statistieke SA het bekend gemaak dat die ekonomiese groeikoers vir dié kwartaal 2,6% was, terwyl dit 2,8% en 4,6% in onderskeidelik die tweede en eerste kwartale was.
Volgens mnr. Dawie Maree, ekonoom van Agri SA, is die lae syfer ‘n onaangename verrassing, aangesien die mark ‘n groeikoers van 3,3%, en hyself ‘n koers van sowat 3%, verwag het.
Styging in landbou-groei
Wat die landbou aanbetref, is ‘n styging waargeneem. Die groeikoers vir die sektor was 4,9% in die eerste kwartaal en 13,6% in die tweede kwartaal. Maree sê die groei word egter nie ten volle in die algemene Bruto Binnelandse Groei (BBG) syfer weerspieël nie, aangesien die primêre sektore – landbou en mynwese – slegs 8% daarvan uitmaak. Die landbou is sowat 2,3% van dié syfer.
Hy sê die groeikoers wat in landbou aangeteken is, is ‘n positiewe weerspieëling van die goeie oeste in die kwartaal, “maar ons kan nie verwag dat dit permanent so goed sal gaan nie, daar is beperkings.
“Die sektor kan egter ‘n goeie bydrae tot die groei van die ekonomie maak, indien die omgewing waarbinne die landbou moet funksioneer gunstig is. Iets wat nie in die groeisyfers weerspieël word nie, is die stroom-af bydrae wat die landbou tot die ekonomie maak en dit kan nie gering geskat word nie,” verduidelik Maree.
Te laag
Volgens Maree is die groeikoers tans te laag. Volgens Solidariteit staan die groeikoers vir die afgelope twee jaar (sewe kwartale) op 0,7%.
“Om werklik ekonomiese vooruitgang en armoedeverligting te bewerkstelling, behoort ekonomiese groei beduidend groter te wees as die bevolkingsgroei. Volgens Statistieke SA se 2010 mid-jaar bevolkingsvoorspelling is die geskatte bevolkingsgroei 1,06%. ‘n BBP groei van minder as 1% is dus nie voldoende nie,” verduidelik hy.
Die stakings wat die afgelope paar maande voorgekom het, asook die feit dat Fifa nie meer in die land is nie en konstruksie ná die Wêreldbeker-sokkertoernooi afgeneem het, is volgens Maree van die knelpunte wat die groeikoers beïnvloed.
24 November 2010
