Met die vele veranderinge wat die afgelope jaar by Graan SA plaasgevind het, soos die verskuiwing van sy kantore na Pretoria, fokus die organisasie op sy jaarlikse kongres op nuwe geleenthede.
Die kongres begin Woensdag (7 Maart 2012) op Nampopark buite Bothaville.
Luidens ’n mediaverklaring sê die organisasie in die tyd van verandering is sekere strategiese fokuspunte geïdentifiseer waarin nuwe geleenthede vir die landbou ’n belangrik rol speel. Derhalwe is vanjaar se kongrestema ‘‘Nuwe geleenthede: Invoervervanging en uitvoerbevordering’’.
Program
Die eerste dag van die kongres is ’n oop sessie waar afgevaardigdes en gaste ook aan ’n gespreksforum kan deelneem. Van die sprekers in dié sessie is mnr. Derek Hanekom, adjunkminister van Wetenskap en Tegnologie, prof. Jonathan Jansen, vise-kanselier en rektor van die Universiteit van die Vrystaat, en mnr. Stephen Hanival, hoofdirekteur van agro-verwerking by die Departement van Handel en Nywerheid.
Hanekom sal die hoofspreker wees en hy sal kongresgangers oor navorsingstegnologie en voeselsekerheid inlig. Jansen sal fokus op die belangrikheid van leierskap binne die landboubedryf, terwyl Hanival agro-verwerking met die klem op bio-brandstof en perskapasiteit vir oliesade, sal verduidelik.
Op die tweede dag van die kongres, 8 Maart 2012, word op huishoudelike sake gefokus.
1 Maart 2012
