As deel van ’n strategie om landbou-ontwikkeling na die graanproduserende landelike gebiede uit te brei en groter ondersteuning aan sy 1 648 ontwikkelende produsente-lede te verbeter, het Graan SA verlede week op Maclear sy derde streekkantoor in die Oos-Kaap geopen.
Die ander twee kantore is op Mthatha en Kokstad. Die opening is deur mnr. Senzeni Zokwana, Minister van Landbou, Bosbou en Visserye, waargeneem.
Zokwana het gesê dit is belangrik om produksie in die provinsie op dreef te kry wat kan help om binne die volgende dekade voedselsekerheid in die land te bewerkstellig. “Boerdery het ’n toekoms. Mynbou het ’n begin en ’n einde. Mynbou voed slegs ’n paar aandeelhouers, terwyl landbou nasies voed.
Hy het gesê in die Nasionale Ontwikkelingsplan word landbou as voedsel- en werkverskaffingsektor geïdentifiseer. “Die Oos-Kaap is die gebied in ons land waar voedselproduksie, veral mielie-, sojabone- en sorghumproduksie, uitgebrei kan word. Die biobrandstofaanleg wat by Cradock opgerig gaan word, sal met graansorghum bedryf word, wat waarskynlik geproduseer sal word deur die boere wat vanuit hierdie kantoor bedien word," het Zokwana gesê.
Mnr. Jannie de Villiers, die uitvoerende hoofbestuurder van Graan SA, het gesê dat elke mieliepit wat in Suid-Afrika geplant word, ’n belegging teen armoede is. “Die vestiging van tien landbou-ontwikkelingsentrums wat ’n totaal van 4 115 swart produsente in die graanproduserende provinsies ondersteun, onderstreep Graan SA se strategie om tot suksesvolle grondhervorming in Suid-Afrika by te dra, terwyl dit huishoudelike sowel as nasionale voedselsekerheid vir die nasie verseker.”
Die finansiering van Graan SA se landbou-ontwikkelingsprogram in die Oos-Kaap sal deur die Mielietrust, en die subsidiëring van produsente se produksiekoste deur die Grain Farmers Development Association (GFADA) geskied.
De Villiers het daarop gewys dat swart boere sukkel om finansiering te bekom aangesien hulle nie oor die titelaktes van die grond wat hulle bewerk, beskik nie. Hy het gevra dat finansiële instellings alternatiewe maniere vind om nuwe toetreders tot graanproduksie te akkommodeer.
Byskrif: Van links is mnre. Jannie de Villiers, uitvoerende hoofbestuurder van Graan SA, Vusi Ngesi, provinsiale koördineerder op Maclear, Louw Steytler, voorsitter van Graan SA, Senzeni Zokwana, Minister van Landbou, Bosbou en Visserye, Karabo Peele, voorsitter van die Mielietrust en Victor Mongoato, ondervoorsitter van Graan SA. (Klik net op foto om te vergroot.)
