Mnr. Dirkie Loubser, ’n boer en vervoerkontrakteur van Noordwes, sal veral onthou word vir die liefdadigheidswerk wat hy in sy omgewing van jongs af gedoen het.
“As hy ’n verskil in mense se lewens kon maak, het hy dit gedoen,” sê mnr. Thinus van Zijl, uitvoerende hoof van Agri Gauteng, wat ’n aangetroude familielid van Loubser was. “Ek onthou in die tydperk van die covid-19-inperking het hy daagliks van 200 tot 500 borde warm kos aan vragmotorbestuurders gegee wat nie by ’n vulstasie of elders kon kos koop nie. Hy het die kos by sy eie stilhouplek aan hulle beskikbaar gestel.
“Hy het ’n baie sagte hart gehad en was altyd gereed om ander mense te gaan help. Dit is hoe mense hom geken het. Hy was enige tyd, dag of nag, gereed om mense te help. Hy was ook ’n familiemens en het alles moontlik gedoen om na sy werkers om te sien.”
Mnr. Wickus Dreyer, voorsitter van Agri Mareetsane, sê in 2013 was Loubser voorsitter van Agri Mareetsane waar hy diep spore in die gemeenskap getrap het. Hy was ook ’n hoofbestuurslid van Graan SA vir die Mahikeng-streek van 2010 tot 2016.
“Wat sy liefdadigheidswerk betref, was Dirkie al so vroeg as in 2007 betrokke by Projek Amos, ’n liefdadigheidsprojek waarin hulle kos Zimbawe toe vervoer het om mense in nood te help. Hy was in beheer van die projek en het die vragmotors vir vervoer gereël.”
Loubser het nou saam met mnr. Burre Burger gewerk wat van Maart 2017 af bekend geraak het vir die verskaffing van noodvoer aan boere in droogtegeteisterde gebiede. In dié tyd is ver meer as 1 000 vragte noodvoer oor Suid-Afrika heen verskaf en Loubser het gehelp om vervoer te verskaf.
Dreyer sê hy meen Loubser se hart was altyd meer in die vervoerbedryf. “Hy het grootgeword op Villiersdorp waar sy pa ’n transportonderneming bedryf het. Sy pa het toe kom grond koop by Mareetsane en Dirkie het later weer so stelselmatig met vervoerwerk begin.
“Hy was in ’n stadium ook ’n baie groot graanboer – as ek moet skat seker hier by die 10 000 ha in ’n stadium. Daar was ’n tyd toe die droogte maar almal geknyp het en hy het toe die grond verkoop en weer ernstig by die vervoerbedryf betrokke geraak.”
Loubsher het vermoedelik aan sy eie hand gesterf.
Hy word oorleef deur sy vrou, Hilmarie, dogter, Hilze, en seun, Gielie.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
