Die vreugdevure brand hoog in Suid-Afrikaanse graankringe nadat ’n amptelike protokol vir die uitvoer van Suid-Afrikaanse mielies na China uiteindelik onderteken is.
Dít open ’n reuse-internasionale mark vir die RSA se mielies, en lê ’n stewige fondament vir toekomstige groei van die nasionale landbousektor.
China moes die laaste vyf jaar gemiddeld 2,9 miljoen ton mielies per jaar invoer – van 980 000 ton tot so veel as 5,2 miljoen ton – omdat sy plaaslike invoere te kort geskiet het om in die land se graan-behoefte te voorsien.
Die algemene verwagting is dat dié land net vir die September 2015-bemarkingsjaar 2,5 miljoen ton mielies gaan moet invoer, sê mnr. Jannie de Villiers, Graan SA se uitvoerende hoof.
China het tot dusver gewoonlik Amerikaanse mielies ingevoer, maar het sedert 2013 ook uit Argentinië en die Oekraïene begin invoer.
Suid-Afrika het ’n voordeel bo mededingers in die mielie-uitvoermark danksy sy gunstige ligging en sy boere se vermoë om van die beste kontantgewasse te produseer. SA boere produseer byna deurlopend oorskot-mielies, wat nie net verbruikers bevoordeel deur bekostigbare stapelvoeding te voorsien nie, maar ook tot die land se uitvoerverdienste bydra, sê De Villiers.
Permanente uitvoermarkte, soos China, sal plaaslike boere aanmoedig om voort te gaan om oorskotte te produseer, wat ook Suid-Afrika se eie voedselsekuriteit sal verseker.
Die ondertekening van die China-protokol is die vrug van jare se harde werk agter die skerms deur amptenare van beide Graan SA en die Regering. Dié proses is in 2011 al deur mnr. Neels Ferreira, vorige Graan SA-voorsitter, en me. Tina Joemat-Pettersson, vorige Minister van Landbou, begin.
De Villiers wens landbouminister Senzeni Zokwana geluk, wat pas die fitosanitêre protokol-ooreenkoms met sy Chinese eweknie, minister Zhi Shuping, onderteken het. Hy sonder ook dr. Julian Jaftha en mev. Alice Baxter van die Departement van Landbou, Bosbou en Visserye, vir hul onbaatsugtige bydrae uit.
“Hierdie beteken werklik baie vir die mense van Suid-Afrika en die boere wat ons nasie voed,” sê De Villiers in sy reaksie.
Die vestiging van nuwe en potensieel volhoubaarder uitvoermarkte was die laaste jare een van Graan SA se sleutel-fokuspunte. Innoverende planne word voortdurend gemaak om dié doelwit te bereik en gevestigde uitvoermarkte na buite Afrika ook uit te brei, hetsy in Asië, die Midde-Ooste of selfs verder, sê De Villiers.
