Alumni van die akademie het bymekaargekom om ’n dinkskrum te hou en na oplossings vir die huidige kwessies binne die landboubedryf te soek.
Bedryfsleiers, insluitende mnre. Ndaba Ntsele, uitvoerende voorsitter van Pamodzi en die Black Business Council, Kallie Schoeman, besturende direkteur van die Schoeman-groep, Pierre Verceuil, voorsitter van Agri SA, Chris Schutte, uitvoerende hoofbestuurder van Astral Foods, en Jannie de Villiers, voormalige hoofbestuurder van Graan SA, het afgevaardigdes toegespreek oor die rol wat hul boerderye moet speel.
Schoeman het aan die alumni gesê om hulself toekoms-bestand te maak. “Skep die perfekte storm in jou verbeelding en maak gereed vir die ergste, terwyl jy steeds hoop op die beste,” het Schoeman die Stockdale-paradoks aangehaal en alumni aangeraai om deurentyd risiko-analises uit te voer. “Daar moet ook ’n plan wees om jouself teen die huidige bestel te beskerm en dit moet deel vorm van ’n verantwoordelikheid om aktief in die landbou-politieke arena te wees. Hierdie nuwe jong groep moet die landbou help om by die kwessie van swart en wit produsente verby te beweeg. Dit beteken ook dat huidige leiers nuwe produsente om die tafel moet kry wat ernstig is oor opvolging. Dit is julle wat ook meer uitgesproke moet word oor die huidige situasie en help om ’n oplossing te vind. Staan op, daag op en lei in julle gemeenskappe,” het Schoeman gesê.
