Me. Tammy Breedt, VF Plus-LP, sê dele van die park word as weiveld vir die besetters se vee gebruik. Honde jag die wild en verskeur glo soms die diere. As gevolg van die honde is daar geen oribi’s in die park oor nie.
Breedt sê die VF Plus het me. Barbara Creecy, minister van bosbou, visserye en omgewingsake, skriftelik versoek om by die situasie in te gryp sodat kwessies soos toegangsbeheer en omheining opgelos kan word.
“Daar moet strenger toegangsbeheer by die toegangspunte van die park toegepas word aangesien daar glo geen wagte by die hekke is nie en die heining rondom die park op sekere plekke heeltemal ontbreek. Die biodiversiteit en wild van die park kan slegs beskerm word indien goed bewaakte heinings opgerig en in stand gehou word.”
Sy sê die party het Creecy ook versoek om die departement van landbou, grondhervorming en landelike ontwikkeling te versoek om alternatiewe weiding te verskaf op landbougrond wat aan die staat behoort.
“Die besetting van grond in nasionale parke skep ’n gevaarlike presedent wat ’n reusebedreiging vir al die parke in Suid-Afrika inhou en mag onder geen omstandighede toegelaat word nie.
“Die ANC-regering ag dit nie belangrik om nasionale parke te beskerm nie. Dit skep ’n gevaarlike situasie waar natuurlike hulpbronne nie vir die nageslag beskerm en bewaar sal word nie.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
