‘n Bevinding van die Appèlhof het die wind uit die seile van ‘n grondeienaarsvereniging oos van Pretoria geneem en dié is nou op pad na die Grondwethof.
In ‘n nuusverklaring sê mnr. Louis Meintjes die gemeenskap van die Nokeng-munisipaliteit het met skok en ongeloof kennis geneem van die uitspraak van die Appèlhof wat ’n appèl in die Noord-Gautengse Hooggeregshof gehandhaaf het.
“Die uitspraak moet saam gelees word met twee Ouditeur-generaal-verslae en een forensiese oudit wat aangedui het dat die Nokeng-munisipaliteit aan geen wetlike vereistes voldoen het nie, die tariewe wat ingestel is onwettig is en dat daar geen behoorlike finansiële bestuur was nie. Dit moet ook saamgelees word met die spandabelrigheid van die burgemeester en die feit dat die munisipaliteit onder administrasie is weens finansiële wanbestuur.
“Dié uitspraak neem ons van ‘n regstaat tot in ‘n staat waar anargie en onwettige aksies die reël is,” sê Meintjes, lid van die Dinokeng-grondeienaarsvereniging.
“Die uitspraak gee ook aan alle munisipaliteit die reg om te maak en doen wat hulle wil sonder inagneming van enige wetlike vereistes.”
‘Wetgewing van geen waarde’
Volgens Meintjes plaas dit alle munisipaliteite in ‘n onaanvegbare posisie, waar die Grondwet en alle munisipale wetgewing van geen waarde is nie.
“Dit gee munisipaliteite nou die reg om geld te vermors, korrup te wees en te bestuur soos wat hulle wil, en daar is geen kans vir verweer nie.
“Die Dinokeng Grondeienaarsvereniging kan en sal die saak nie hier laat nie.
“Ons sal die saak nou in die Grondwetlike Hof moet verder voer. Ons moet verseker dat elke inwoner die reg het om hom te verweer teen disfunksionele en korrupte munisipaliteite wat ‘n put geword het waarin geld verdwyn sonder enige teenprestasie en wat in wese slegs verseker dat die amptenare se lewens standaard onderhou word.
Sonder welslae
“Vir sewe jaar probeer die Dinokeng GEV om die munisipaliteit te dwing om binne die wet op te tree en dat die belange van almal in die munisipaliteit belangrik is, sonder enige sukses.
“Die integriteit van die inwoners sal ook nou getoets word deur hulle vermoë om saam te staan teen die onreg.
“Ons sal ook die regters wil vra om ons te vertel hoe om ‘n korrupte disfunksionele munisipaliteit te dissiplineer. ’n Munisipaliteit bestaan per slot van rekening volgens wet uit drie entiteite nl. die raad, die administrasie en die gemeenskap. In alle gevalle word die gemeenskap as non-entiteit geag,” sê Meintjes.
Lees hiermee saam:
DA-munisipaliteit hof toe gesleep
4 Oktober 2010
