Om grondhervorming meer vaartbelyn te maak, verdeel die Departement van Landelike Ontwikkeling en Grondhervorming nou sy tak vir grondhervorming en administrasie in twee strategies gerigte takke.
Die een tak sal hom slegs op die herverdeling van grond en die ontwikkeling daarvan toespits, terwyl die ander een op grondbesit en administrasie sal fokus.
Mnr. Mdu Shabane, direkteur-generaal van die Departement van Landelike Ontwikkeling en Grondhervorming, sê in die departement se 2013/’14 jaarverslag dat die siening dat kwessies by die aankoop van grond en herverdeling gespesialiseerde fokus benodig, die motivering was om die tak só te verdeel.
Daar was ook ’n besef dat meer aandag aan grondbesitstelsels en die administrasie van grond gegee moet word. “Terwyl die herstruktureringsproses aan die gang is, is 153 586 hektaar grond aangekoop en 119 plase het ondersteuning deur middel van die herkapitaliserings- en ontwikkelingsprogram gedurende jaar onder hersiening gekry.”
Shabane wys ook uit dat bystand via die bestuursprogram vir diere en veld aan gemeenskappe verleen is om hul produksievermoë te verbeter. ’n Honderd meer projekte, wat besproeiing en die landbou inlsuit, was deur die bestuursprogam voltooi teenoor die aanvanklike teiken van 182 projekte. Die Kommissie vir gondeise het ook in die boekjaar 270 grondeise afgehandel en 292 eise gefinaliseer.
Teen die einde van die boekjaar was 5 000 plase, wat altesaam 4,2 miljoen hektaar beslaan, sedert 1994 oorgedra. Nagenoeg 80 000 grondeise (3,5 miljoen hektaar) is afgehandel en 1,8 miljoen mense het hierby baatgevind, het mnr. Gugile Nkwinti, Minister van Landelike Ontwikkeling en Grondhervorming, gesê.
Die departement het nou sy eerste vyf-jaar siklus as nuut gevormde departement voltooi. Die departement het voor 2009 as die Departement van Landbou en Grondsake bekendgestaan.
