Ná ‘n uitgerekte hofstryd het die Grondwethof bevind dat Senwes in sy heffing van silo-fooie inderdaad die Mededingingswet oortree het.
Dit kom nege jaar nadat dié graanreus, wat jaarliks amper 'n derde van die land se graan- en oliesaad-oeste hanteer en berg, weens die onmededingende heffing van siloberging-fooie by die Mededingingskommissie verkla is.
CTH Trading, ‘n graanverhandelaar van Stellenbosch, het Senwes in 2004 by die kommissie aangekla omdat hy boere ná 100 dae se graanberging ‘n laer silo-tarief gevra het as wat hy van graanverhandelaars (wat met hom op die graanmark meegeding het) gehef het.
Sedertdien het die saak ná appèlle en baie tegniese argumente tot in die Grondwethof gevorder. Die Grondwethof het nou beslis dat Senwes wel die Mededingingswet oortree het, omdat hy verskillende tariewe gehef het.
Die tariewe het mededingers verhinder om met Senwes mee te ding en hul eie graanbelange uit te brei. Die oortreding is nie met ‘n boete strafbaar nie.
Nie 'marge-druk'
Die Grondwethof-regters het voorts in ‘n meerderheidsuitspraak daarop gewys dat die Mededingingstribunaal Senwes se oortreding van die wet verkeerdelik “marge-druk” genoem het, omdat dié term nie in die wet gebruik word nie.
Die Hoogste Hof van Appèl se uitspraak in Senwes se guns is dus deur die Grondwethof tersyde gestel, maar terselfdertyd is die tribunaal se bevinding aangepas deur die term marge-druk daaruit te verwyder.
Mnr. Francois Strydom, Senwes se besturende direkteur, het in reaksie gesê hulle is uiteraard teleurgesteld met die Grondwethof-bevinding, veral na die lang en duur proses.
Hy het daarop gewys dat die maatskappy in 2008 al sy bergingtariefstrukture hersien het, sodat alle gebruikers van hul berggeriewe nou die kans het om op ‘n gelyke voet vanaf ‘n verskeidenheid van tarief-opsies te kies.
14 April 2012
