Inligting oor markte en produkte wat beskikbaar is, is nodig om as riglyn te dien vir produksiebesluite in Suid-Afrika, sê Graan SA.
Mnr. Jannie de Villiers, hoofbestuurder, sê hoe meer inligting oor die verwerkingskant beskikbaar is, hoe beter kan beplanning aan die produksiekant gedoen word. Hy was ‘n spreker tydens Agri SA se jaarkongres in Johannesburg.
“Sonder die regte inligting is dit onmoontlik om ingeligte produksie- en bemarkingsbesluite te neem,” aldus De Villiers. Sedert 2009, na aanleiding van ondersoeke deur die Mededingingskommissie, duur onsekerheid oor die deel van inligting binne die markomgewing voort.
Die kommissie
Volgens De Villiers het die Forum van Hoof-uitvoerende Beamptes aan die Nasionale Landboubemarkingsraad opdrag gegee om ondersoek te doen oor die inwin, gebruik en verspreiding van inligting deur landbou- en produsente-organisasies, asook die organisasies se verwerkers. Voorstelle vir riglyne in dié verband is aan die kommissie voorgelê, maar De Villiers sê die kommissie kon nie sy weg oopsien om die riglyne goed te keur nie.
Die kommissie verkies dat die Mededingingstribunaal eerder uitsprake hieroor moet lewer. De Villiers verwag dat verskeie bedrywe die kommissie nou gaan nader vir statutêre inligting ná hulle ‘n eerste uitsondering - vir die uitruil van markinligting binne die brandstofbedryf - op 3 Oktober 2011 goedgekeur het.
De Villiers sê hulle sal graag binnekort sulke statutêre stappe vir die landboubedryf goedgekeur wil sien, want ‘n styging word in die prys van mielie-verwante produkte voorsien. “Dit beteken dat verbruikers gaan kwaad word, almal gaan kwaad word, waar as die inligting beskikbaar sou wees dít nie die geval sou wees nie.”
17 Oktober 2011
